Kwayedza
Kingstone Mapupu
MAPURISA ekuBeatrice kudunhu reMashonaland East vakasunga murume aivhima mhuka zviri kunze kwemutemo papurazi reko apo vamwe vake vaviri vakatiza kukawanikwa mutumbi wenguruve yemusango imwechete iyo vainge vauraya.
Mutauriri wemapurisa kudunhu iri, Inspector Simon Chazovachii, vanotsinhira nyaya yekusungwa kwaTichaona Mhariwa (39) wepaPlot 51, kuMarirangwe nemusi wa23 Chikunguru.
Zvinonzi nemusi uyu nenguva dza2 mangwanani, VaChristian Chisora (48) nevamwe vavo vanorinda masango epapurazi repaLanark Game Park rinochengetwa mhuka, vaifamba vachichengetedza nzvimbo iyi pavakazonzwa imbwa dzichihukura.
“Varindi vepapurazi iri pavakanzwa imbwa idzi vakazoenda kwaibva ruzha urwu uko vakanoona varume vatatu vaivhima.
“Varume ava vakatiza vachibva vadonhedza mutumbi wenguruve iyo vakanga vauraya,” vanodaro Insp Chazovachii.
INSP CHAZOVACHII
Vanonzi vakatiza ndokuenda kune rumwe rutivi rwepapurazi iri ndokunotanga kuvhima ikoko.
Magadhi emupurazi iri vakavatevera ndokuvaridza pfuti katatu mudenga uye ndokuzoridza rimwe bara rechina rakananga kwaiva nevanhu ava apo vakazokwanisa kusunga Mhariwa asi vamwe vake vaviri ndokutiza.
“Tichaona Mhariwa akazosungwa nemagadhi aya nyaya iyi ndokuzomhan’arwa kumapurisa ekuBeatrice.
“Pakazouya matikitivha ekukamba iyi pamwe chete nemamwe mapurisa kuzoferefeta nyaya iyi. Murume akasungwa uyu ari kubatsirana nemapurisa mukuferefetwa kwenyaya iyi.
“Semapurisa, tiri kukumbira kuruzhinji kuti vatibatsire mukusungwa kwevamwe vaviri vakatiza,” vanodaro.
Vanoyambirawo veruzhinji kuti imhosva kuvhima mhuka Usina matsamba anobvumidza kuita izvi.
Kune vane ruzivo nekuda kwevamwe vaviri vari kutsvagwa nemapurisa ava vanokwanisa kuridza nhare panhamba dzinoti 0772 844 744 kana kuzivisa mapurisa ari padyo navo.
Mutauriri weZimbabwe Parks & Wildlife Management Authority, VaTinashe Farawo, vanotiwo mabasa ekuvhimwa kwemhuka dzesango munyika zviri kunze kwemutemo ari kuwanda.
“Tinoshanda pamwe chete nemapurisa saka ikurudziro yedu kuti vanhu vakadai vasungwe mhuka dzesango dzisapedzwe,” vanodaro VaFarawo.
