Kwayedza
Yeukai Karengeza
MURUME wekuMbare – nyakutengesera doro kuvana gumi vane makore ari pakati pemashanu negumi nerimwe okuberekwa panguva yezororo reKisimasi – akandwa mujeri kwemakore maviri.
Phaeton Mutiyaya (23) akamiswa pamberi pemutongi wedare reMbare Magistrate Court, VaBatanai Madzingira, achipomerwa mhosva yekutengesera vana doro, kutengesa doro asina rezinesi uye kushanda asina rezinesi rechitoro.
Muchuchisi Muzvare Janet Mlambo vakaudza dare kuti Mutiyaya akatengesera vana ava doro, chinova chiitiko chakatenderera zvakanyanya padandemutande apo vakatorwa mifananidzo vakabata doro uye vamwe vakadhakwa.
Mifananidzo iyi yakakonzera kunyunyuta kweveruzhinji zvikaita kuti mapurisa avhime mupari wemhosva uyo akazosungwa mushure mekuferefetwa kwenyaya iyi.
Nekuda kwekutengesa doro kuvana, mupari wemhosva akatongerwa kugara mujeri kwemwedzi gumi nemiviri, kutengesa doro asina rezinesi redoro akapihwa chirango chemimwe mwedzi gumi nemiviri saka mutongo wake wose makore maviri.
Mimwe yemwedzi mina yakawedzerwa pamhosva yekutengesa asina rezinesi rechitoro asi yakazosendekwa parutivi kwemakore mashanu anotevera paine chitsidzo chehunhu hwakanaka kana abuda.
Mutiyaya akapihwawo mwedzi mina yehusungwa iyo yakasendekwa parutivi zvekare kwemakore mashanu paine chitsidzo chehunhu hwakanaka nekuda kwemhosva yekushanda pasina rezinesi rechitoro.
