Kwayedza
Abel Ndooka
SANGANO reZimbabwe Cricket riri kupembera kuhwina kwakaita zvikwata zvaro zviviri, chevarume nechemadzimai, izvo zvakahwina menduru dzegoridhe kumutambo we13th African Games waitambirwa kuAccra Ghana masvondo adarika.
Gore rino, kuAfrican Games ndipo pakatanga kutambwa cricket apo Zimbabwe yakabva yanyora nhoroondo yekuve nyika yekutanga kuhwina menduru dzegoridhe.
Chikwata chemadzimai ndicho chakatanga kuwana menduru yegoridhe masvondo adarika zvichitevera kuhwina kwachakaita mitambo yacho yese.
Cheverume ndokuzotevera chikahwina mitambo yacho yese zvekare.
Zvichitevera kuhwina kwakaita maYoung Chevrons menduru yegoridhe kumutambo uyu, chikwata ichi chakapihwa mubairo weUS$80 000 wekuchitenda nebasa rachakabata neZC iyo ichagovanwa pakati pevatambi nevarairidzi sezvakangoitwa chikwata chemadzimai.
MaYoung Chevrons akahwina goridhe zvichitevera kukunda kwaakaita Namibia mufainari ne114 runs mumutambo wainakidza zvikuru kukunda ngoma kurira.
Muchinyorwa, mutungamiri weZC – Tavengwa Mukuhlani – anoti matambiro akaita zvikwata zvavo anorakidza kuti remangwana renyika mumutambo uyu rakajeka.
“Matambiro nezvakabuda kumaAfrican Games zvaidadisa uye tinonzwa mufaro mukuru nematambiro akaita zvikwata zvedu zvevarume pamwe chete nemadzimai nekumirira kwavakaita nyika.
“Chinhu chikuru ichi uye zvinotirakidza kuti tiri pedyo nekuita zvinodadisa.
“Madzimai edu ange achitamba zvepamusoro muAfrica kwenguva refu, tichitarisa nemafambiro avari kuita manje-manje ndinoona ave kutamba zvepamusoro achikwikwidza nezvikwata zvikurusa.
“Takatumira zvikwata zvevatambi vachiri kusimukira uye vese vaive nemakore ari pasi pe25 okuberekwa kumitambo yeAfrican Games. Ndine chivimbo chikuru chekuti vatambi ava nguva pfupi iri kutevera vachange vave kutamba cricket yepamusoro, inonwisa mvura,” anodaro Mukuhlani.
