Kwayedza
Kingstone Mapupu
MAPURISA ekuMatabeleland South vanoti vari kutsvaga murume anogara kuBeitbridge nemhosva yekuba midziyo nemari nehukopokopo zvemunhu uyo waaishanda naye mubhizimisi rekuhodha zvinhu vachitengesa.
Mutauriri wemapurisa kudunhu iri, Inspector Loveness Mangena, vanoti vari kutsvaga Ishmael Shuma Daniso (28) uyo anozivikanwa achigara kumaRed Bricks ekuBeitbridge.
“Mapurisa ari kutsvaga murume anonzi Ishmael Shuma Daniso nemhosva yekuba midziyo yakasiyana nemari zvinokosha US$1 000 izvo aitengesa, zvinova zvaBright Mutara (27) anogara kunzvimbo yeBeitbridge panhamba 1639 kuDulibadzimu,” vanodaro Insp Mangena.
Midziyo yakabiwa nemurume uyu inonzi inosanganisira mabhatiri, macompressor nezvimwe izvo akabva atiza nazvo ndokuenda kusina anoziva.
Mhosva iyi yakaparwa munaKubvumnbi gore rino ndokumhan’arwa kumapurisa ekuBeitbridge uye ine nhamba dzinoti RRB-218/05/21.
Kune vanoziva kune murume uyu vanokwanisa kuridza nhare dzinoti 0779 656 802 kana kuzivisa mapurisa ari padyo navo.
Zvinonzi pane fungidziro huru yekuti murume uyu angangodaro ari kunzvimbo dzinoti kuChiweshe kuMashonaland Central kana kuZvishavane kuMidlands.