Kwayedza
Kingstone Mapupu
KANZURU yeguta reHarare iri kuyambira vagari vari kungorima pose-pose, kusanganisira mumahombekombe enzizi nedzimwe nzvimbo dzisingabvumidzwe, kuti imhosva huru izvo zvinogona kuita kuti vasungwe.
Mutauriri wekanzuru, VaStanley Gama, vanoti kune minda yakawanda mumarukisheni emuHarare uko vagari vari kurima vakatevedza nzizi, migwagwa nemunzvimbo dzakachengeterwa kuvakwa zvingava zvikoro kana zvimwe zvakakosha.
“Tine nzizi dzakakosha mukati meguta reHarare dzisingade kuzara jecha izvo zvave kukanganiswa nekurimwa kweminda iyi. Mumapani nedzimwe nzvimbo, vamwe vari kungoita madiro zvisinei kuti mune dzimwe nzvimbo idzi takaisa zvikwangwari zvakanyorwa kuti hapabvumidzwe kurima,” vanodaro VaGama.
Vanoti mukurima uku, vamwe vanoguma vava kutsemura mapombi anofambisa mvura kana esuweji.
“Mutemo wekanzuru yedu yeHarare newenyika unotaura pachena kuti kurima munzvimbo idzi hakubvumidzwe. Tine chikamu chedu chemapurisa anosungira kutevedzwa kwemitemo ayo akapihwa chisungo chekubata vanhu ava nekutora mamwe matanho. Munguva pfupi iri kutevera, vachange vachifamba pamwe chete nemapurisa eZRP vachiongorora mamiriro ezvinhu aya,” vanodaro VaGama.
Stanley Gama
Nekuda kwechibage chiri kurimwa munzvimbo dzakasiyana muHarare, zvinonzi kune vamwe vanhu vanoguma vava kurohwa nematsotsi anovahwandira muzvirimwa kana mumasora.
“Kune matanho makuru ari kutorwa nekuda kwevagari vanorima muminda isingatenderwi kusanganisa mumapani nemumahombekombe enzizi. Iyi imhosva sezvo kuita kwakadai kusingabvumidzwe,” vanodaro VaGama.
