Kwayedza
Abel Ndooka
NHANDARE yenhabvu ine mukurumbira yeRufaro Stadium yazovhurwa mushure mekupedza makore mana isiri kutambirwa mitambo yePremier Soccer League (PSL).
Ichatambirwa mutambo wekutanga svondo rinotevera musi weChina apo pachasangana CAPS United neBikita Minerals.
Zuva rinozotevera musi weChishanu, Yadah Stars ichange iri pamusha paRufaro Stadium apo ichatatsurana neDynamos FC mumutambo weCastle Premiership.
Mitambo iyi ndiyo yekutanga kutambirwa muHarare mwaka uno sezvo mange musati mave nenhandare yaishandiswa kutambirwa mitambo yePSL.
Kushaikwa kwenhandare dziri padanho rinotenderwa kutambirwa mitambo yePSL kwange kuchiona zvikwata zvemuHarare zvichienda kunotambira mitambo yazvo kunze kweguta iri.
Svondo radarika, Dynamos yakaenda kuBabourfields Stadium kuBulawayo kunotamba neHwange, kuchiti Herentals College neCAPS United zvakananga kuKariba kunotambira mutambo wazvo kuNyamhunga Stadium.