Kwayedza
Kingstone Mapupu —
N’ANGA yemuHarare — Sekuru Kamwelo Banda — svondo rapera “vakakonzeresa” pachiteshi chinokwirirwa makombi nemabhazi chepanaSimon Muzenda Street, muguta reHarare apo vakamomoterwa nemahwindi nevamwe veruzhinji vairatidza kuvafarira.
Sekuru Banda vakatozonunurwa nevarindi vavo apo mahwindi vaida kuvasimudza mudenga vachishevedzera kuti, “Sekuru Banda, Sekuru Banda!”.
Vaive vaenda pachiteshi ichi vachida kutenda vatyairi vemakombi nemahwindi nekutakura kwavari kuita vanhu vanenge vachienda kumba kwavo kuCranborne vachinotsvaga kubatsirwa mumatambudziko akasiyana.
Mamwe makombi epachiteshi ichi seanoenda kuEpworth akatonyorwa kuti “KwaSekuru Banda”.
“Ndasvika ndichida kutenda vatyairi vemakombi nemahwindi nekuunza kwavanoita vanhu vandinobatsira. Pavandiziva, vanhu vamhanya vamwe vachisiya zvavanga vachitengesa nekubuda mumakombi ndikambundirwa nekumhoreswa. Ndazobatsirwa nemukomana wangu wandinofamba naye ‘Terminator’ uyo amira-mira kuti ndisasimudzwe mudenga,” vanodaro Sekuru Banda. Sekuru Banda vakazotenderera pachiteshi ichi vachikurukura nevanhu nekunzwa zvichemo zvavo.
“Vemakombi vari kutenda kuti makombi avo ave kuzara nevanhu vanouya kuzobatsirwa neni. Iko kumba kwangu makombi ava kutopinda mukati achitakura vanhu,” vanodaro.
Paitenderera Sekuru Banda pachiteshi ichi, vanhu vainzwikwa vachitaura zvakawanda.
“Sekuru Banda tanetswa nemapurisa ekanzuru, meresai kanzuru nemapurisa acho mazamu.
“Vatumirei makudo nezvidhoma kana zvinyaride kudzimba kwavo,” mumwe mukadzi akanzwikwa achidaro.
Mashoko aya anotevera nyaya yakabuda nguva yadarika apo Sekuru Banda vanonzi vakabatsira mumwe murume anonzi akatorerwa mukadzi wake nechikomba zvikaita kuti chikomba chacho chimere mazamu mushure mekunge chagadzirwa nemishonga uyewo mumwewo murume anonzi akatumirwa gudo apo ainge ahwapura mudzimai wemuridzi.
“Ini ndakabirwa foni nezuro, mukadzi wangu akatorwa nemumwe hwindi saka pindirai sekuru. Handisi kubata mari, inongobhururuka,” anodaro mumwe murume achiudza Sekuru Banda.
Kwayedza yakakurukura nevamwe vashandi vemakombi vepachiteshi apa vanosanganisira Cuthbert Jongwe, Tafirenyika Matendengu, Tonderai Muchapondwa, Talkmore Kuemba Nzou, David Luka, Kudakwashe Panganai, Madzibaba Zago naEdmore Charakupa avo vose vanorumbidza Sekuru Banda.
“Motokari dzedu dzava kugara dzakazara kuenda nekudzoka kuCranborne kwaSekuru Banda uye isuwo tiri kuenda nematambudziko edu tichinobatsirwa,” anodaro Muchapondwa.
