Kwayedza
Kingstone Mapupu
SEKURU Friday Chisanyu — avo vange vari mukuru wesangano rinomirira varapi vechivanhu reZimbabwe National Practitioners Association (ZINPA) — vashaya.
Sekuru Chisanyu vakashaya nemusi weChipiri svondo rino mushure mekurwara kwenguva pfupi vari kumba kwavo kuSt Mary’s, kuChitungwiza.
Mudzimai wavo, Mai Molline Machikiche Chisanyu (40), vanotsinhira kufa kwemurume wavo.
“Sekuru vakashaika masikati emusi weChipiri 19 Ndira kumba kwedu kuSt Mary’s Infill apo vakangorwara kwesvondo rimwe chete vari pamba.
“Vange vaine chirwere cheshuga, iyo yaikwira zvakanyanya mukati mesvondo iri ndokuzoshaika ndichingova navo pano pamba,” vanodaro Mai Chisanyu.
Vanoti pakashaika Sekuru Chisanyu, mutumbi wavo wakazotorwa nevekambani inoviga vafi ndokuendeswa kumochari muguta reHarare uchimirira kuzochengetedzwa.
“Tichatora mutumbi wavo nhasi masikati (Chitatu) tobva tananga kumusha kwedu kwaChundu, kuHurungwe, uko tichanovaviga mangwana (China) mushure mekuita chivanhu semunhu aiita zvechivanhu,” vanodaro Mai Chisanyu.
Vanoti Sekuru Chisanyu vasiya vana gumi.
