Kwayedza
Abel Ndooka
CHIKWATA cheTeam Zimbabwe icho chichakwikwidza kumutambo weAfrican Union Sports Council Region V Under-20 Youths Games kuBulawayo muna Zvita chakapinda mukembi svondo radarika apo chave kusimbisa gadziriro dzacho. Team Zimbabwe ichakwikwidza mumitambo yevakomana nevasikana inosanganisira kumhanya, basketball, nhabvu, judo netsiva.
Chikwata ichi chiri kuita gadziriro dzacho paBulawayo Polytechnic apo chichange chichigara kusvika mutambo uyu watanga.
Head of delegation weTeam Zimbabwe, Sebastain Garikai, anoti havasi vose vatambi vakapinda mukembi svondo radarika sezvo vamwe vana vachiri kuzvikoro zvavo uko vari kunyora bvunzo dzavo dzeO neA Level.
Garikai anoti chikwata chavo chicharwa semvumba kuti chikwanise kuhwina menduru nekukundawo zvimwe zvakaita seSouth Africa iyo inogarohwina mutambo uyu.
“Tave kupinda mugiya dzvuku izvezvi nekupinda kwatakaita mukembi svondo radarika nekuti tave kuchiita gadziriro dzekupedzisira takatarisana nemutambo weAfrican Union Sports Council region V Under-20 Youth Games.
“Zvikwata zvedu zvakasiyana izvo zvichakwikwidza kumutambo zvange zvichiita gadziriro nguva yadarika apo zvange zvichitirena National Sports Stadium pamwe nekuzvikoro zvakasiyana.
“Tine vamwe vatambi vedu vachiri kuzvikoro vari kunyora bvunzo avo vachozopinda mukembi vapedza kunyora,” akadaro Garikai.
Mutambo weAfrican Union Sports Council Region V Under-20 uchatanga musi waZvita 4 kusvika 14.
Zimbabwe ichange ichimirirwa nevatambi 224 mumitambo yakasiyana.
