Kwayedza
Abel Ndooka
SANGANO reZimbabwe Chess Federation (ZCF) rakaumba chikwata cheTeam Zimbabwe chichakwikwidza mumutambo wevasungwa we3rd FIDE Intercontinental Online Chess Championship for Prisoners.
Mutambo uyu unotambwa padandemutande uchirongwa nesangano reWorld Chess Federation (FIDE) rakabatana neChicago Cook County Sheriff.
Gore rino, mutambo uyu uchatanga nemusi wa11 Gunyana uchipera nemusi wa13 uye uchange une zvikwata 100 zvinobva kunyika 46.
Sangano reZCF rine hukama hwakasimba neZimbabwe Prisons and Correctional Services (ZPCS) izvo zvinoona richironga mitambo yechess inotambwa kumajeri.
Muchinyorwa, munyori mukuru weZCF – Todd Mapingire – anoti sangano ravo neZPCS vari kushanda zvakasimba mukuona kuti chikwata cheZimbabwe chakagadzirira apo chakatarisana nemutambo uyu.
Mapingire anoti gore rino, Zimbabwe ichange ine chikwata chemadzimai chekutanga izvo zvinorakidza kuti sangano ravo rakazvipira kupa mikana yakaenzana pakati pevanhukadzi nevanhurume.
“SeZimbabwe Chess Federation, takabatana neZimbabwe Prisons and Correctional Services, tiri kushanda zvakasimba kuti chikwata chedu chinge chakagadzirira zvakasimba chigotamba zvinonwisa mvura pamutambo uyu we3rd FIDE Intercontinental Online Chess Championship for Prisoners.
“Isu seZCF, tinoda kutenda Zimbabwe Prisons and Correctional Services nekushanda kwatiri kuita nayo nekutipa vatambi izvo zviri kuona nyika yedu ichigara ichimirirwa mumutambo uyu. Gore rino, tine mufaro mukuru kuzivisa kuti tine chikwata chemadzimai chichakwikwidzawo mumutambo uyu.
“Tinokurudzira veruzhinji vatsigire chikwata chedu apo chichakwikwidza,” anodaro Mapingire.
Zimbabwe yakatanga kukwikwidza mumutambo uyu makore adarika uye gore rayatanga yakatamba zvakanwisa mvura izvo zvakaiona ichisvika kufainari uko yakazokundirwa neMongolia nechibodzwa chimwe chete.
