Kwayedza
Abel Ndooka
CHIKWATA cheZimbabwe Cricket chichasangana nePakistan A kana kuti Shaheens mumitambo misere inoti miviri yeTest Match nemitanhatu yeOne Day International Series segadziriro apo chakatarisana nemutambo weICC Men’s Cricket World Cup Qualifier 2023.
Mutambo World Cup Qualifier uyu uchatambirwa muno kutanga munaChikumi.
Mitambo yeZimbabwe nePakistan Shaheens ichatanga nemusi wa3 Chivabvu kunhandare dzinoti Kwekwe Sports Club, Mutare Sports Club, Takashinga Cricket Club neHarare Sports Club.
Muchinyorwa, mutauriri weZimbabwe Cricket – Darlington Majonga – anoti mutambo uyu wakarongwa neZC nechinangwa chekuti maChevrons awane mukana wekunyatsogadzirira apo akatarisana nekurwira tikiti rekuenda kuICC Men’s Cricket World Cup 2023 kuIndia.
Mutambo weICC Men’s Cricket World Cup Qualifier 2023, uyo uchatambirwa muno, uchange une zvikwata 10 zvichakwikwidza asi pachitsvagwa zvikwata zviviri zvichaenda kuWorld Cup kuIndia.
“ZC yakaronga mutambo uyu kuti ubatsire Zimbabwe mugadziriro dzayo dzekuzotamba paICC Men’s Cricket World Cup Qualifier 2023 iyo ichatambirwa kunhandare ina dziri muHarare nekuBulawayo kubva musi wa18 Chikumi kusvika 9 Chikunguru,” anodaro Majonga.
Mutambo wekut anga wemaChevrons nePakistan, uchatambirwa kuKwekwe kubva musi wa3 Chivabvu kusvika 6 Chivabvu, kuchiti wechipiri uchizotambirwa kwaMutare kutanga nemusi wa10 Chivabvu uchizopera musi wa13 Chivabvu.
Mitambo yekutanga iyi inenge iri yemaTest Match.
Panopera mitambo iyi, zvikwata zviviri izvi zvinobva zvatanga kutatsurana mumitambo yeODI iyo ichatambwa mumazuva anoti 17, 19, 21, 23, 25 na27 Chivabvu.
Mutambo wekutanga weODI uchatambirwa kuTakashinga Cricket Club uye mimwe mishanu yese ichitambirwa kuHarare Sports.
