Kwayedza
Kingstone Mapupu
MAPURISA eZimbabwe Republic Police (ZRP) vekuGlen Norah, muguta reHarare, vari kuferefeta nyaya yemaguruvhani matatu ekuBeitbridge avo vanonzi vanga vachibira ruzhinji mari dzekuti vanokwanisa kurapa vachishandisa maFacebook Accounts nemifananidzo uyewo number dzenhare dzen’nga Sekuru Kanengo vekuFidelity nedzaSekuru Tasvu vekuMabelreign.
Vatatu vasungwa vanosanganisa ane mhotsi Mthulisi Moyo, Petronella Dube naAllen Vhimba.
Nyaya iyi iri kuferefetwa mumhosva ine nhamba dzeRRB dzinoti 93.09.23.
Vatatu ava vose vanobva kuBeitbridge uye vakavharirwa muchitokisi pakamba yemapurisa yeGlen Norah vachimirira kuzoenda kumatare edzimhosva.
Sekuru Tasvu naSekuru Kanengo vawanikwa pakamba iyi vachipa mashoko avo mukuferefetwa kwenyaya iyi. Mari yakabirwa machiremba maviri aya inodarika US$10 000, maRands, neimwewo.
