Kwayedza
Kingstone Mapupu
MAPURISA eZimbabwe Republic Police (ZRP) ekwaNyamweda, kuMhondoro ari kuferefeta nyaya yatezvara weko anonzi akaponda mukuwasha wake apo aimupomera mhosva yekumuwanikidza achida kumubira mbudzi dzake muchirugwi pakati pehusiku.
Clever Kadza (35) wemubhuku raShekede ari kupomerwa mhosva yekuponda Tendai Manhanzva (27) uyo aigara mubhuku rekwaManhanzva, mudunhu rimwechete iri.
Mutauriri wemapurisa kudunhu reMashonaland West, Assistant Inspector Ian Kohwera, vanotsinhira nyaya iyi.
Vanoti mukuwasha uyu akatanga kunetsana nemudzimai wake, Lainah Size, achimupomera kuita zvikomba.
“Tendai Manhanzva anonzi nemusi wa13 Nyamavhuvhu akatanga kunetsana nemudzimai wake Lainah Size achimupomera kuva nezvikomba. Anonzi akazodzinga mudzimai uyu pamba achibva aenda kuvabereki vake.
“Mudzimai uyu anonzi akatakura midziyo yose yepamba kusanganisira chikafu ndokuenda nazvo kuvabereki vake,” vanodaro Asst Insp Kohwera.
Size anonzi akatakura zvinhu izvi pasina chibvumirano nemurume wake izvo zvakamugumbura.
Mambo Nyamweda
Nemusi wa14 Nyamavhuvhu, Manhanzva anonzi akatevera kumba kwevabereki vemudzimai wake uko aida kunopihwa midziyo yainge yatorwa naSize.
Akasvika ndokuona tezvara vake, Clever Kadza, avo vanonzi havana kufadzwa nezvaida kuitwa nemukuwasha wavo ndokutanga kurwisana apo vakazorandutsirwa nevavakidzani.
Asst Insp Kohwera vanoti nenguva dzemambakwedza emusi wa15 Nyamavhuvhu, Manhanzva anonzi akadzokera kumba kwatezvara vake uku akasvikopinda muchirugwi chembudzi aine chinangwa chekuba mbudzi senzira yekutsiva midziyo yake yairambirwa natezvara zvose nemudzimai wake.
“Clever Kadza anonzi akanzwa ruzha kuchirugwi chembudzi ndokupakatira bango iro akaenda naro kunoona kuti chii chaiitika asina ruzivo rwekuti aiva mukuwasha wake. Mukucherechedza, zvinonzi tezvara uyu akaona munhu muchirugwi aida kuba mbudzi.
“Pakarepo, tezvara akarova munhu uyu nedanda mumusoro achibva angowira pasi,” vanodaro Asst Insp Kohwera.
Kadza anonzi akazosiya munhu uyu akapunzikira pasi ndokunozivisa VaBanda Mudhara (45) vemubhuku raMashanda apo vakazouya ndokuzoona kuti aiva mukuwasha wavo.
VaMashanda vanonzi vakazotakura Manhanzva kuenda naye kukiriniki yeMarirangwe ukuwo tezvara vake vakamhan’ara nyaya yekuti vainge vachida kubirwa mbudzi.
“Tendai Manhanzva akazoendeswa kuchipatara cheChitungwiza Central Hospital uko akasvika achifa asati abatsirwa. Nyaya iyi iri kufeewa apo Clever Kadza ari mumaoko memapurisa nekuda kwemhosva yaari kupomerwa yekuponda achimirira kuenda kumatare edzimhosva,” vanodaro Asst Insp Kohwera.
Zvichakadai, Mambo Nyamweda VaClaudious Mandaza, vakazopa chirango kumhuri yekwaKadza chekuti vatakure rufu rwose rwemukuwasha wavo pachimirirwa kuzotauriranwa pakati pemhuri mbiri idzi kuti vazoripana pachivanhu.
