Kwayedza
Kingstone Mapupu
MURUME wekwaMpalawani, kuZvishavane akasungwa mushure mekuwanikwa aine madzinde 114 embanje aive mubindu rake neimwe yaive yakavigwa kumba kwake.
Chamas Nyoni (52) anobva kuIngezi C Village akasungwa nematikitivha mushure mekunge varumwa nzeve neveruzhinji kuti anoita basa rekurima nekutengesa mbanje zvisiri pamutemo.
“Mapurisa vawana runyerekupe urwu, vakabva vaenda kumusha kwake kwaMpalawani ndokuenda kubindu rake uko vakawana madzinde embanje. Pakarepo vakabva vamuwana ari mumunda make ndokumusunga,” vanodaro Inspector Emmanuel Mahoko avo vanova mutauriri wemapurisa kudunhu reMidlands.
Mukuferefetwa kwenyaya iyi, murume uyu anonzi akazoratidza mapurisa madzinde embanje anokwana 114 aiva nehurefu hunobvira pa40 centimetres kusvika mamita 1,2 yaiva mubindu rake iyo yakanga yatoibva.
Mbanje iyi yakabva yadzurwa nemapurisa ndokuendwa nayo kuti izoshandiswa seumboo mudare.
Mapurisa anonzi akazoenda kumba kwaNyoni ndokusecha muimba yake yekubikira yehuswa vakawana 600 grammes dzembanje yakaiswa mumapurasitiki yakavigwa pasi pemasaga echibage.
“Musungwa uyu akazoendwa naye nematikitivha kumuzinda wavo wemaCID kuZvishavane uko ari kubatsira mukuferefetwa kwenyaya iyi. Semapurisa, tinotenda zvikuru veruzhinji nekubatsira nemashoko anoita kuti nhubu dzisungwe uyewo tinoyambira veruzhinji kusatora zvinodhaka sezvo zviine mikana mikuru yekukanganisa utano hwavo,” vanodaro Insp Mahoko.
MuZimbabwe, imhosva kurima mbanje munhu asina kupihwa rezinesi.
