Kwayedza
Kingstone Mapupu
MURUME ane makore 40 okuberekwa wekwaChiundura, kuGweru, anonzi akafa nekuzvisungirira mushure mekupopotedzana nemudzimai wake.
Inspector Emmanuel Mahoko, avo vanova mutauriri wemapurisa kudunhu reMidlands, vanoti Anderson Mureverwi akatanga kupopotedzana nemudzimai wake, Faith Solomon, vari pachikoro cheGambiza Secondary School chiri kwaChiundura nemusi wa25 Kukadzi.
“Nemusi wa24 Kukadzi nenguva dza2100 hours, Anderson Mureverwi akasvika pachikoro cheGambiza Secondary apo mudzimai wake, Faith Solomon, anogara nemwanasikana wavo wemakore maviri okuberekwa. Murume uyu aida kuona mwanasikana wavo uyo aisanzwa zvakanaka,” vanodaro Insp Mahoko.
Mureverwi anonzi akarara pachikoro apa kusvikira rechimangwana racho nemusi wa25 Kukadzi.
“Mangwanani acho nenguva dza7 mangwanani, mudzimai uyu anonzi akabvunza murume uyu kuti aironga kuzooneka pamba apa rinhi izvo zvakamugumbura vachibva vatanga kupopotedzana.
Mureverwi anonzi akazotora banga remukicheni ndokubaya Solomon kanokwana kana kumusana nekamwe chete kuruoko rwekuruboshwe, murume uyu akazobva atiza achisiya mudzimai uyu mumba,” vanodaro mapurisa.
Murume anonzi Bernard Chitando (53) wekwaSabhuku Musvori kudunhu raMambo Gambiza anova mupurisa wemumusha anonzi akazonzwa nezvenyaya iyi achibva aenda kunzvimbo iyi ndokunowana mutumbi waMureverwi wakarembera pamapango emumba mavo.
Nyaya iyi yakazomhan’arwa kumapurisa ekuGweru Rural.
“Tinokurudzira veruzhinji kuti kana paita kunetsana, vazivisewo vakuru vari munzvimbo dzavari, vangava masabhuku nemadzishe kana makanzura, vakuru vedzisvondo kana mapurisa kuti pawanikwe vanoyananisa. Vanhu ngavasiyanewo nekutora mutemo vachiisa muhomwe dzavo,” vanodaro Insp Mahoko.
