Kwayedza
VANA vechikoro, hounoi mukana wekupota muchitumira mibvunzo yenyu kuKwayedza tibatsirane kuti Shona ireruke. Tumirai mibvunzo yenyu kuMupepeti nenhare dzinoti +263 714 200 007 kana e-mail inoti: [email protected] kana [email protected]. Taura zita rako rizere, chikoro chako, giredhi, nenzvimbo inowanikwa chikoro chako.
* * *
MHINDURO DZESVONDO RAPERA:
Pane zvirimwa zvakawanda, uye zvinobereka nenzira dzakasiyana-siyana. Zvimwe zvirimwa zvinotambarara kana kutanda, zvimwe zvinoitira vana vazvo pasi pevhu, zvimwe zvichiberekera vana vazvo pamusoro pevhu. Tiudze zvirimwa zvaunoziva zvinotambarara kana kutanda.
MHINDURO:
1. Magaka
2. Manhanga
3. Nyemba
4. Mashamba/Mafere
5. Mbambaira
6. Manwiwa/Mavise
* * *
ZVAKANYORWA NEVANA:
Ndinonzi Sharon Thompson, ndinodzidza Grade 3 paGotora Primary School kuWedza.
Zvirimwa zvinotanda zvinoti magaka, mbambaira, nyemba, masanhi, manwiwa nemashamba.
* * *
Aaron Kuutsi ARI KUITA uPPER 6 paSanzaguru High AKABVUNZA KUTI:
Rondedzero inonzi Makakatanwa inopindurwa sei? (Hoyo mubvunzo varairidzi nevana vechikoro).
* * *
Zita rangu ndinonzi Portia Makuvire, ndiri kuita Form 4 paMzilikazi High, kuBulawayo.
Mubvunzo wangu uri pakuti kana ukanzi (semuenzaniso) “Musoro webhuku Tambaoga Mwanangu unoenderana here nezviri mubhuku? Tsigira zvizere.” Ipapo panondinetsa kupindura nemazvo, ndibatsireiwo. (Varairidzi batsirai mwana.)
* * *
ZVEKUITA SVONDO RINO:
Pane tupuka twakawanda twunogara muvhu. Tumwe twacho twakatozoita kuti paitwe tsumo sedzekuti: 1. Chinoziva ivhu kuti mwana wembeva anorwara. 2. Mbeva zhinji hadzina mashe. Tiudze tupuka twaunoziva twunoberekera vana vatwo muvhu uye twuchigara muvhu.
* * *
Mhinduro svondo rinouya.
