Kwayedza
Malven Mugadzikwa
SANGANO reConfederation of Zimbabwe Retailers (CZR) riri kuita gadziriro dzekufambiswa kwemusangano mukuru wemabhizimisi uyo uchaitwa gore rino.
Mukuru wesangano iri, VaDenford Mutashu, vanoti musangano uyu ndewekutanga kuitwa munyika muno apo vemabhizimisi vachasangana nemutungamiriri wenyika President Mnangagwa vachikurukura pamusoro pezvinotarisirwa nevemabhizimisi mukusimudzira upfumi.
Musangano uyu uri kurongwa neCZR uye unotarisirwa kuitwa muHarare nemusi wa10 Kukadzi.
“Hurukuro dzemusangano uyu dzakaitwa gore rapera taona isu vemabhizimisi kuti tinofanira kuwana mukana wekupota tichitaura nemukuru wenyika mukuronga kufambiswa kweupfumi hwenyika. Musangano uyu uchange uine vemasangano akasiyana, kunyanya vari mune zvemabhizimisi. Tiri kutarisira vemabhizimisi vanopfuura chiuru kuti vange vari pamusangano uyu vachitaura nemutungamiriri wenyika.
“Chinangwa chemusangano uyu kuti vemabhizimisi vataure zvinyunyuto zvavo uye vachiisawo pfungwa dzavo pakuti upfumi hwenyika hwogadziriswa sei,” vanodaro VaMutashu.
Vanoenderera mberi vachiti: “Uyu ndiwo mukana zvakare wekuti vane mimwe miono kana pfungwa maringe nekufambiswa kwebhizimisi munyika vapakurire pfungwa dzavo kumukuru wenyika. Izvi zvinobatsira kuti kufamba kweupfumi hwenyika kureruke uye kuti vemabhizimisi vapanane mazano maringe nezvitsva zviriko.”
Mamwe masangano ari kutarisirwa kuve pamusangano uyu anosanganisira Buy Zimbabwe, Zimbabwe National Chamber of Commerce (ZNCC), ZimTrade neZIDA.
Pamusangano uyu pachange paine vekune dzimwe nyika kusanganisira zvikwata zvevemabhizimisi zvezvizvarwa zvekuChina nevekuIndia.
Zvimwe zvezvakakosha zvichataurwa mumusangano uyu zvinosanganisira nyaya yekukwira kwemitengo yezvinhu nekuderera kwesimba remari yemuno.
