Kwayedza
Zvave kusvodesa
naStella Chegovo
Maitwaseiko vana vemazuvano
Kutererra vakuru hamuchadi
Zvave kusvodesa zvomoita
Chikoro hamuchadi
Kuramba kudzidza
Muri majaya ne mhandara
Zvave kusvodesa
Kufamba zamu riri panze serembwa
Moramba kupfeka zvakanaka
Muchiti chave chirungu
Majayawo Kufambawo
Nemidhebhe inosiya magaro panze
Zvave kusvodesa
Kukurumida kuda varume musati mave mhandara dzaibva,
Kuita mabasa ekufunga mabhora evarume,nepombi dzavo,
Kubika kupfeka hamugoni bonde ndorazara mumusoro
Kukurumidza kuda vakadzi usati wave jaya raibva
Pamberi pomukadzi ndopowofunga
Zvave kusvodesa
Hamusvodi vana vemazuvano
KUda kuroorana nemari yekonde konde
Kuda kuitirwa muchato nekereke nekusarongeka kwenyu
Zvave kusvodesa
Kusada kuzvishandira
Muchingoti moswera muchinamata
Kuvharira kereke nendimi
Chinoitwa hapana
Zvave kusvodesa
Kuda kuzogadzirisa upenyu
Machembera hamusvodi
Vana vemazuvano
Kuda kuzodzidza pamwechete nevana venyu
Zvave kusvodesa
MAONERO
Nyanduri wedu Stella Chegovo ane maziso chaiwo emunyori, maziso anoongorora nekucherechedza zvinhu zvisina kumira zvakanaka. Chinhu chaanyatsondigonera kuyanika pachena hupenzi hwezvinhu zvaari kuti zvave kusvodesa. Hausare uine mubvunzo, uye kana ndiri seni ndashamisika pamwe chete nekudzidza zvizhinji nekuda kwenhetembo iyoyi. Nyanduri wedu ari kutaura chokwadi chinorwadza, asi chichivaka. Saka nhetembo yake tingati ndeyekuraya, kutsiura nekudzidzisa.
Ndine mhosho dzezviperengo nezvimwe zvakaita sekupatsanurwa nekubatanidzwa kwemazwi, asi handichaisa pfungwa dzangu pane izvozvo nekuti sekuona kwandaita, inyaya yekutaipwa nekusadzokorora zvaunenge wanyora. Asi ndinokurudzira vanyori kuti muedze chose kuti basa renyu ribude rakachena kuitira kuti nyaya yamuri kutaura nezvayo irege kurasika nekuda kwemhosho.
Nhetembo iyi inoratidza hudzamu hwepfungwa dzemunyori nekuti zvaari kudzidzisa vamwe vake zvinobva mukusvoda nehunhu hwavo. Ichi ndicho chikonzero chaita kuti ape nhetembo yake musoro wekuti, “Zvave kusvodesa.” Haaperere pakungoti zvave kusvodesa zvomoita, asi anotanga kunongedzera chimwe nechimwe chezvinhu zvaasiri kufara nazvo muhunhu hwevechidiki. Nyangwe zvazvo achitanga nekutsanangura zvinhu izvi nemutauro usina kupfuma, anozobva atanga kushandisa fananidzo dzinorwadza anoteerera. Anoti mundima yechipiri, “Kufamba zamu riri panze serembwa.”
Kwandiri iyi haisi nyaya yekusapfeka zvakanaka chete sekutsanangura kwaanoita, asi ari kushoresesa hunhu hwekusapfeka zvakanaka hwavako. Kana munhu akafananidzwa nembwa, zvinoreva kuti haasisina hunhu maari. Uye kune vanoziva hunhu hwembwa kana totaura zvebonde, munoziva kuti dzakafumuka zvikuru. Nyanduri wedu paanotaura nezvemagaro ave kusiiwa panze nevakomana, ndanga ndichida kuti apfuurire mberi nemutauro wakadzama sewaashandisa pakutaura zvekufamba mazamu ari panze.
Mutauro waStella wakadzama. Ndafarira paanotaura kuti, “musati mave mhandara dzaibva.” Unobva wanzwisisa zvakajeka kuti ari kuti vasikana vari kumhanyira zvisiri zvezera ravo. Kana ukadya muchero mumbishi, tomboti mango, unoita hugugu uye unorwara nemudumbu nekuti nguva yawo haisati yakwana. Saka izvi ndizvowo zvimwechete zviri kutaura Stella kuti vasikana vachiri maganga mambishi anokora vave kuda kuzviti vaibva, asi kwete inhema chaidzo. Nyangwe zvazvo aedza kutaura nechibhende, mutsananguriro waStella wekuti, “mabhora evarume nepombi dzavo” unogona kutorwa nepamwe nevamwe. Asi ndinowirirana naye kuti zvinhu ngazvitaurwe sezvazviri nekuti tikazvinyenyeredza vana vanoramba vachirasika.
Stella mupurisa wetsika nehunhu, uye ndafara nekuona kwake kurerutsa kwave kuita vechidiki wanano zvekupedzisira munhu aroora nemari yekonde konde kana yemudeme-mudeme. Zvinoita kuti vawanana vasakoshese wanano iyoyo nekuti yakangouya nyore. Stella uri mugwara rakanaka, ndinoda kuti uwedzere kushandisa mutauro nezvidavado zvinosimbisa nhetembo. Ndiri kuda kuti ubve pakutaura zvinhu uchishandisa mutauro wemazuva ese wakareruka, asi utambire kwakadzama sekwawasvika uchitaura zvezamu rembwa. Ramba uchinyora!
