Kwayedza
ZVINYINI zvinoizwa pachiNdau kana munhu eizwi wadziuraya zviya. Unoitwe maikirenyi kana zvadaro. Kana wazwi waiya kuchipatara zviya, kana wapetuka mutumbi wake, hautenderwi kupinde mumhatso akadi. Unondoti kuuya rurwa nekuende kumakuwa.
Zveeshe zvinonga zveiryiwe papfumvu yakwe azvibikirwi mumhatso akadi. Zvinobikirwe pabanze. Kuti afire pashi pemuti, anhu anomuchemere pashi pemuti. Kana asunhurwa zviyana, muti wacho unotemwa.
Kuti azvisungirire mumhatso, nhungo yacho inobviswa. Saka tiri kuti kana akazvisungirira mumhatsomwo, unochemerwe mumhatsomwo mwaazvisungirira. Paandofira ndipo paanochemerwa, hembe dzake dzaaipfeka, unoenda nadzo muiba.
Apa tiri kureketa ngezviro zvake zveeshe zvekupfeka. Tiri kuti zveshe nanyakwenda muiba mwakemwo. Tinoziye kuti munharaunda dzedu kumakanyiyo, uri mukhuba wedu pachiNdau neamweni anorekete ndimi dzakasiyana kuti munhu unoizirwe nyaradzo. Pachitsunge apana nyaradzo.
Mwandoembera mweipedze kufushira zvatopera, kuzondoti henyu mungazokumana fumirei wacho kumubvumo kumakuwa. Uku kunonga kuri kooringire kuti apazi kushanjwa ere madeikoni paiba redu. Photophoto kwaakusimure muti anhu oparara hawo.
Ngatirekete ndeiti ndakadziona foni dzakaphucuka nemakhombita echikandwe muguwa mwazwa. Amweni ari kureketa ngendaa yekude koovhunyungure guwa rechimweni chitsunge, icho anhu ane mukarakadzo wekuti chaiya chidiza chemare yaemho.
Tichazoreketahe ngerimweni ngegama iri rinoti chidiza, kwenyamashi tinoti mweisarai atei tokumanahe pachirongwa ngemusi weChina.
