Kwayedza
Kingstone Mapupu
MURUME anga akabata mukombe wekunyangara pachiso munyika yose – Mr Ugly Zimbabwe, Mison Sere (51) – uyo akashaya svondo rapera, akavigwa kumakuva ekuTafara, muHarare, nemusi weSvondo wadarika.
Mison anga achigara mumusha weNew Mabvuku, muHarare, uye akashaika asina kurwara kwakaonekwa apo akangonhongwa akafira muchimbuzi chepamba pavo.
Mr Ugly aigara pamba pasekuru vake.
Murume uyu aizivikanwa nekutora zvinodhaka murukisheni rweMabvuku, sekutaura kwehama dzake.
VaNorman Bepe (49), avo vanova babamudiki vaMison, vanoti vakazoradzika mutumnbi wake nemusi weSvondo wadarika kumakuva ekuTafara.
Mison Sere
Vanoti mutoro wenhamo yavo wakareruka nekuda kwerubatsiro rwavakapihwa naCde Scott Sakupwanya avo vanova mumiririri mutsva weMabvuku-Tafara mudare reNational Assembly vakabatsira nezvekudya, kutenga bhokisi nezvimwe zvaidiwa panhamo iyi.
“Mison akashaika uri musi weChipiri husiku apunzika muchimbuzi, mutumbi wake uchibva watakurwa kuendeswa kumochari yechipatara cheParirenyatwa. Mutumbi uyu wakagarako kusvika nemusi weMugovera apo wakatorwa ukazorara mumba.
“Takazouviga neSvondo patsika dzechivanhu chedu paine Gule waMukulu yaitungamirira kureva zvinyau. Tinotenda nerubatsiro rwatakawaniswa naCde Sakupwanya nekuti zvinhu zvakazoreruka,” vanodaro VaBepe.
