Kwayedza
Munyori weKwayedza
MVURA zhinji inotarisirwa kunaya munzvimbo dzakawanda dzenyika kwemazuva manomwe — kubva nhasi (China) kusvika Chitatu svondo rinouya — sekutaura kwebazi reMeteorological Services Department, apo Inter-Tropical Convergence Zone ichasangana nehore yemvura iri kufamba ichibva kumadokero kwenyika.
Mvura inotarisirwa kunaya zvokudzika pasi kupfuura 50mm kune dzimwe nzvimbo dzeZimbabwe.
Iri kutarisirwa kunaya kunzvimbo dzinosanganisira Bulawayo, Matobo, Umzingwane, Insiza neMangwe kuMatabeleland South uye Umguza neBubi kuMatabeleland North.
Inonzi ichanaya zvekare zvokudzika kudarika 50mm kuZvishavane, Shurugwi, Kwekwe, Kadoma, Chirumhanzu neMberengwa kuMidlands neChivi neGutu kuMasvingo.
Kuchamhembe, mvura inotarisirwa kunaya zvekudzika 50mm muHarare Metropolitan, Chegutu, Zvimba, Bindura, Shamva, Uzumba-Maramba-Pfungwe kuMashonaland West neChikomba, Seke, Wedza, Marondera, Murehwa neMutoko kuMashonaland East.
Dzimwe nzvimbo, kunyangwe zvazvo dzichitarisirwa kuwana mvura yakawanda, hainaye zvekudzika pasi kusvika 50mm.
MSD inoyambira veruzhinji kuti mvura iyi ichanaya iine mupande wemheni nechimvuramabwe mune dzimwe nzvimbo uye ichikonzera mafashamu apo matenga edzimba asina kusimba anogona kutakurwa, miti ichidonhedzwa nedutu remhepo.
“Inter-Tropical Convergence Zone (ITCZ), iyo yanga ichisimbarara kumativi ekuchamhembe kwenyika, inotarisirwa kusangana nehore yemvura iri kufamba ichibva nekumadokero ichienda nekumabvazuva uye ichipambira nenyika yose.
“Nekuda kweizvozvo, kusanganiswa kwezviviri izvi kunofanirwa kukonzera kunaya kwemvura inodarika 50mm munzvimbo dziri pedyo nenzvimbo huru yemvura,” inodaro MSD.
Vanhu vanofanirwa kugara mudzimba panguva yekutinhira kunze kwekunge paita zvinoda kuitwa nechimbi-chimbi uye vatyairi vedzimotokari vanoyambirwa kuti vasayambuke nzizi dzakazara.
Kunyange hazvo mvura ichiuya nenjodzi kuvarimi, zvikuru mudunhu reMatabeleland, vane tarisiro yekunaya kwemvura yakawanda sezvo zvimwe zvirimwa zvanga zvava kuratidza kusvava zvakanyanya panguva iyo madhamu asati awana mvura yakawanda.
Nemusi weMuvhuro, Hurumende yakaparura chirongwa cheUS$400 000 chekudyara makore kuitira kuti mvura iwedzere kunaya sezvo nyika iri pakati pemwaka wemamiriro ekunze weEl Nino uyo unotaridza kusanaya kwemvura kwenguva refu.
Guta reBulawayo rinoda zvikuru kunaya kwemvura sezvo mvura yemudhamu yakaderera kusvika pazvikamu makumi mana nezvina kubva muzana apo dhamu reUmzingwane harina mvura kusvika pazvikamu makumi mapfumbamwe nezvishanu kubva muzana.
