Kwayedza
Ropafadzo Ndangariro
NECHINANGWA chekusimudzira dzidzo munyika, sangano reSave the Children rakapa makombiyuta neprinter zvikosha $11 028 kubazi redzidzo yepuraimari nesekondari.
Mumashoko avakaverengerwa svondo rapera, Save the Children director – Muzvare Sarah Blin – vanoti sangano ravo riri kushanda nebazi iri mumatunhu gumi emuZimbabwe.
“Tiri kushanda nebazi iri kumatunhu 10 anoti Mbire, Rushinga, Binga, Gokwe North, Gokwe South, Hwange, Matobo, Beitbridge, Muzarabani neHarare,” vanodaro Muzvare Blin.
“Mune rimwe nerimwe rematunhu aya, tiri kubatsira zvikoro zvinosvika 20 kwemakore manomwe adarika.”
Vanoti sangano ravo riri kutsigira bazi redzidzo mukusimudzira nharaunda inofundirwa nevana.
“Ndinofara kukuzivisai kuti Save the Children iri kutsigira bazi redzidzo mumatunhu ose aya mukusimudzira nharaunda dzinofundira vana kuburikidza nezvivakwa, kupa zvinodiwa nevarairidzi pakudzidzisa nekuvandudza ruzivo rwematicha,” vanodaro.
“Tiri kudzidzisa zvakare nhengo dzemakomiti anomirira vabereki muzvikoro, maSchool Development Committee.”
Muzvare Blin vanokurudzira bazi redzidzo kuti rione kuti makombiyuta aya ashandiswa nemazvo.
“Ndinokurudzira bazi redzidzo nevamwe vavanoshanda navo kuti vaone kuti zvipo izvi zvashandiswa zvizere kusvikira panopera gore rino,” vanodaro.
Vachitaurawo pavaigashira makombiyuta aya, munyori mukuru mubazi redzidzo yepuraimari nesekondari – Dr Sylvia Utete-Masango – vanotenda nerubatsiro rwavakapihwa urwu.
“Rubatsiro rwatapihwa neSave the Children urwu rwuchabatsira zvikuru mukusimudzira kushanda kwedu sebazi redzidzo,” vanodaro.
Vanoti zvikoro zvinofanira kutsigira chirongwa chekuvandudza dzidzo, cheNew Curriculum, senzira yekuvagadzirira remangwana ravo.
“Hatingasariri kumashure, tinofanira kugamuchira New Curriculum nekuda kwezvakanaka zvinowanikwa nemudzidzi uye hatikwanise kutiza nyaya dzemichina yechizvino-zvino,” vanodaro Dr Utete-Masango.
