Kwayedza
Kingstone Mapupu
MAPURISA eZimbabwe Republic Police (ZRP) vari kuferefeta nyaya yevana vana (4) vemumusha weHopley, muHarare vakafa apo vanonzi vaitamba ndokuzvivharira mukati memotokari yaiva yakamiswa pamba iyo isingafambe zvinofungidzirwa kuti vakafa nekutsva nekushaya mweya wekufema.
Vana vakafa ava ndiAnotidaishe Mutize (4), Ashley Matowe (3), Kudzaishe Tsuro (3) naAllen Busiri (3). Mutauriri wemapurisa munyika, Assistant Commissioner Paul Nyathi, vanoti nemusi wa15 Kukadzi nenguva dza12 masikati, vana ava vaitamba padyo nepadzimba dzevabereki vavo.
Vanonzi vakazoenda vakanovhura dhoo remotokari yerudzi rweToyota Chaser isingafambe ine nhamba dzinoti ADE 2684 inova nhema paruvara yaive yakamiswa pamba paVaSimbarashe Makaza (42) vanova muridzi wayo panhamba 512 Zone 1, kuHopley.
“Vana ava vakazvivharira mumota iyi kusvikira vabereki vavo vakatanga kuvatsvaga kubva masikati aya vachivashaya kusvikira kunze kwadoka. Simbarashe Makaza akazodzoka kumba kuma7 usiku kwadoka ndokusvikovhura madhoo emotokari yake achida kutora oyiri yekunoda kushandisa ndokuwana vana ava vakafira mumotokari iyi,” vanodaro Asst Comm Nyathi.
Murume uyu anonzi akazotaura nemudzimai wake, Mai Farisai Seremani (39), panhare avo vaitsvaga vana ava nevabereki vavo.
Nyaya iyi yakazomhan’arwa kumapurisa ekuSouthlea Park.
“Mitumbi yevana ava yatakurwa kuendeswa kuchipatara cheParirenyatwa Group of Hospitals kunoongororwa nanachiremba,” vanodaro Asst Comm Nyathi.
Zvakadai, ruzhiniji rwune kutaura kwakasiyana-siyana nekuda kwenyaya iyi.
VaPromise Mutize (30) babamukuru vaAnotidaishe Mutize, uyo akashaika mutsaona iyi, vanoti havanzwisise mafiro evana ava.
Mashoko avo anotsinhirwa naVaPeter Saramunda (52) sekuru vaAnotidaishe.
Mai Keresia Maropo (45) sahwira wemhuri dzakashaikirwa idzi vanoti vakabatsirana kutsvaga vana ava nanaamai vavo sezvo vose vachiita basa rekutengesa.
Mai Farisai Seremani (35) vane motokari yakafira vana vanoti vaiva pamba pakaitika tsaona iyi asi havana kuona vana ava.
“Ndakaswera ndiripo asi vana ava handina kumbovaona kuti vakapinda mumotokari iyi sei,” vanodaro Mai Seremani.
Mai Elizabeth Milanzi (35), amai vaAshley Matowe, vanoti vari kutadza kutambira mafiro emwana wavo.
“Mwana wangu akafa ndisina kuonekana naye, ndarwadziwa,” vanodaro Mai Milanzi.
Mai Fiona Butawu (28), amai vaAllen Busiri, vanoti havanzwisise zvekare firo yemwana wavo.
Mai Dudzai Butawu (39), amai vaKudzaiishe Tsuro, vakashaya chekutaura nekuda kwenhamo iyi vachitiwo vaitadza kuzvitambira.
VaSteven Bepura (56) sekuru vevana vatatu vakashaika patsaona iyi vanotiwo havazive kuti vachakwanisa kutakura nhamo iyi sei.
