Kwayedza
Muchaneta Chimuka —
SVONDO rino Mai Susan Gamuchirai vanogara kuBindura vanotitsanangurira mabikiro avanoita mazondo enguruve ayo anonzi muto wacho unogwinyisa.
Zvinodiwa:
Mazondo enguruve, matomatisi, chikari, munyu nemafuta.
Mabikiro:
Para mazondo nebanga kana nemuchina kusvika achena.
Bvisa mahwanda nemvere dzose, woageza.
Cheka mazondo kuita zvidimbu zvakafanira.
Chidira makomichi matatu emvura anokwana muchikari, woisa mazondo. Kana ave kuibva, isa matomatisi, hanyanisi, mafuta mashoma-shoma nemunyu.
Mazondo kana aibva anoonekwa nemuto wakakora. Asi usaite kuti anyanye kuibva nekuti anopedzisira abvungunjika.
Wozodii?
Kana zvadai, chibura mudye. Mazondo enguruve anodyiwa nesadza kana kuti akangodaro. Unogona kunwa zvese nemuto wacho.
Sunungukai kutumira zvamunoda kuti zvibude pachirongwa chino panhamba dzinoti +263 713 411 1281.
