Kwayedza
CHITSAUKO 5 (Nyaya yacho: Enderero mberi)
Monika haapinduri Mujubheki asi anodemba kuti chezuva iri naamai vake hameno. Mujubheki anobvunza Monika kuti rokwe raainge akapfeka ndiro iro ainge akamutengera here, ndokusaka vakomana vava kupenga naye.
Monika anoti haasi mukomana wake otya kuti vachanotaurira zvimwe amai agotukwa. Mujubheki anobvunza kuti amai vainge variko here kumba iye ndokuti asiya vaenda kuruwadzano asi anofunga kuti panguva iyi vava kudzoka. Mujubheki anoti anoda kutaura navo.
Mujubheki aenda, kokutanga muupenyu hwake Monika anonzwa kunyatsa kufara mumoyo asi achinetseka kuti amai vaizoti kudini kana asvika kumusha achifunga nezvetsamba yainge yanzi ichanyorwa naTimoti.
ONGORORO
Chitsauko ichi chinopa rerutso (light-heartedness) kubva kune kukakavadzana kuri kuratidzwa munyaya iyi asi kumagumo kwacho tinoona kuchinyuka mamwe makakatanwa sezvo Monika asiri kuziva zvakamumirira mberi. Muverengi anonakidzwa naTimoti zvinoita kuti anzwe kurerukirwa kuramba achidana zita rokuti Monika, kunoratidza kuti mukomana uyu ane zvakadzama mumoyo make.
Mutauro werudo uyu unopota uchitsvenenzverwa neenzaniso izvo tinoona Timoti achiita. Tinonzwa jaya richiti rinoda musikana uyu “sechokoreti” (30) nekutiwo “seshuga” (30). Zvinoitikawo apo vaviri ava vanoonana kunyanya kunaMonika wacho zvinonyatsotsanangurwa nekushandiswa kwemusambo uyu.
Monika apo anocheuka mumashure make ndokusanganidzana maziso ake nemunhu aive mumashure make, anotarisa nekukurumidza kudivi hana yake “yenge chigayo kurova” (16). Apo ainge achirongedza zvinhu zvaaitenga mubasikiti raaive naro, aizviita ruwoko rwake rwuchidedera zvishoma “sorwomunhu ane nhetemwa” (27).
Tinobva taona kushandiswa kwesekerambabvu (sarcasm) iyo inoratidza kuti Mujubheki agodoka nezvaaona. Tinomunzwa achiti, “Ndiro dhirezi randakakutengerai here iri? Inga rakakuteyayi chaizvo saka . . .” (32). Muverengi anonyatsoziva zviri kurehwa nemurume uyu uyewo kuti bundu riri kumunyongonya pahuro.
CHITSAUKO 6 (Nyaya yacho)
Apo Monika anosvika pamba, anowana Mujubheki atovapo kare ari kutaura naamai vake avo vanomuti achavaona musi uyu. Mujubheki anovati vasarova mwana, Monika ngaaende zvake kumba. Monika ndokubva aita saizvozvo ivo ndokusara vachikurukura zvaainge asinganzwi asi achiziva.
Monika anosvikobvunza baba vake kuti vainge vaswera sei nekurwara ivo ndokumubvunza kuti ari kutaura naamai vake ndiyani. Vanoudzwa kuti ndiMujubheki baba ndokuratidza kusamufarira.
Monika anomirira amai vake vainge vaperekedza Mujubheki achiziva kuti vangosvika chete achatanga kupopoterwa semazuva ose. Baba vanomubvunza ruviri kana amai vake vadzoka iye ndokuti havasati. Vanobva varamba sadza ndokubva vasimuka kuenda kugota kwavo, Monika ndokutevera kunovavesera moto sezvo kwaive nechando.
Paanobva kugota kwababa vake, Monika anosvikowana amai vake vave mumba ndokuvakwazisa asi havapinduri. Iye anonyararawo ndokutangisa kumenya nzungu dzake asingasimudzi musoro.
Panomboita runyarararo amai ndokuzomubvunza kana aine mukomana.
Iye anoti kwete ivo ndokuti kubva zvakanaka ndokuisa rushaya rwavo muchanza.
Vanomuti atsidze kuti haazofa akavanyadzisa sezvavakaitwa nemukoma vake Tendai, iye ndokuzviita hake asi anoonekwa ava kuchema amai ndokumuti anochema chii.
Enderero mberi svondo rinouya.
