Kwayedza
CHITSAUKO 5 (Nyaya yacho: Edmore mberi)
Gurukota guru pane anoshevedzwa naDzengeni rinonzi Chiremba. Revai anotsanangura rungano rwake kwava kugumisira achiti: vavariro yake yaiva nerugare. Mambo anoramba akatarisa pambonje iri pamhanza paRevai.
Mapopopo emvura anonaya musi uyu. Makurukota mashanu amambo anosvika Revai ava kutopedzisa kurondedzera nyaya yake kuna ishe avo vainge vatoitumbura vari vega uku vatuma shoko rekudana vapi vemazano.
Ishe anoti mhosva huru yakaparwa naRevai iyo ave kumutonga nayo ndeyekuti akatumwa navavengi kuti azoongorora zvakaita musha wamambo. Achamuvharira muhusungwa kwemazuva mashanu kuti anyatse kufungisisa zvekutaurira mambo. Ngaayeuke kuti akahwandira muzukuru wamambo akamutevera kusvika kumba kwake achida kumuponda.
Mapinduriro anoita Revai anoita kuti mambo ashatirwe zvekuti anombofunga zvekumukan’aura netsvimbo asi anozeza zvakare kutyora imwe tsvimbo.
Chiremba anonzi ngaachiita basa rake iye ndokuti anoda kutanga vabvunza nhoroondo yacho kuna Mazvikokota vasati vaitumbura. Mazvikokota anoti Revai akamunhanyisa achida kumuuraya kudzamara apinda mumba make chaimo. Atura mafemo, akazonzwa imbwa kuhukura. Akazoudza vamwe kuti Revai akanga akatomira nemuti, apo
akati amubvunze ndipo apo Revai akatiza iye ndokushevedzera. Chiremba akaudza Revai kuti avaudzewo zviri mudura make iye ndokutanga kutaura achiratidza kusatya kana kuvhunduka.
Anotaura zita rake, baba vake, kwaaigara kuna Ruya kwaShe Chokupamba, ari kutsvaga verudzi rwake. Anobva ataura zvainge zvaitika nezuro wacho ndokupedzisira achiti zvave kwavari nedare ravo kuti vaite zvavanoda.
Chiremba anoti Revai zvaanenge ari kureva nepamwe wani, pamwe Mazvikokota neugwaru hwake ndiye akatotiza asina kuona chinhu. Akadini kumira semurume? Mazvikokota ava kuona kuti nyaya yainge yomumomotera anodzokorora zvaambotaura achindandamira ndokuti Revai haana pekutanga asi akazoshamisika kuti sei akasvika pamba pake.
Asi kana Revai aine chokwadi nezvaanoreva, anokumbira ruregerero pamusoro pekumukuvadza kwaakaita. Mambo anoti kuti Revai ataure chokwadi anofanira kuchengetedzwa muhusungwa izvo zvinobva zvaitwa.
ONGORORO
Munyori anombopota achitekenyedza setswa dzemuverengi apo anenge achipa tsanangudzo dzemagariro evanhu. Muverengi anonzwa setswa dzake dzichitekenyedzwa apo anoverenga panoti, Revai achidongorera mumukanwa mashe “akaona zvitsito zvaidongorera mukanwa mashe ari mazino. Zigwanza raive pamberi raive vende rerimwe rakadonha nekuora. Kasoro kashe waiti idamba rakaoma” (51).
Tinosangana neimwe ndima ine musambo uyu. Matsananguriro anoitwa chimiro chaDzengeni anoti kusetsa zvichinzi, “Tuziso tudikidiki twaingodongorera mukati meziguma, waiti akasikwa nyoka dzaneta. Aive nezviromo zvakafara zvinenge zvedzetse” (52).
Kunyange zvazvo kudai vanhu vaida kurwisa Revai vainge vakawanda zvinhu zvinoitwa nevanhu vazhinji hazviendereri mberi sezviya zvinoitwa navanhu vashoma vanenge vazvipira. Vanhu vose ava vaigona kutadza kurwisa Revai akagona kupukunyuka nemukati mavo. Ndokusaka tichiona munyori achishandisa tsumo inoti, “Zvinonzi mbeva zhinji hadzina mashe” (50). Zvinhu zvaida kuwanikwa zvihombe naRevai, zvaitoda kuti azviite pore-pore achipota achitsvaga kune vamwe vanhu. Hazvaiita kubva ati chiriporipotyo kupinda mune zvaaitsvaga zvacho ndokusaka rwendo rwaRevai rwaizotora nguva huru nematambudziko. “. . . kukwira gomo hupoterera” (50), munyori anodaro. Iye ainge ambopinda mune matambudziko mahombe, iye zvino ava kuchenjerera kuti asachiitazve nenzira yaakambochiita nayo.
