Kwayedza
Munyori weKwayedza —
HURUMENDE inoti ichapinza mabasa varairidzi vanosvika 2 300 mwedzi unouya, waChivabvu, zvikoro zvisati zvavhurwa kuitira kuti pange paine kudzidziswa kwakazara kwezviri mugwaro idzva redzidzo rinodaidzwa kuti New Curriculum.
Gurukota rezvevashandi nekubatsirwa kwevanotambura, Cde Prisca Mupfumira, vanoti Public Service Commission (PSC) yakatogadzirira kupinza vamwe varairidzi mabasa.
Vanoti bazi redzidzo yepuraimari nesekondari rinoda vamwe varairidzi vanodarika 7 000 nekukasika, nekudaro vachapinzwa mabasa vari muzvikamu nezvikamu kutanga ne2 300 temu iri kutevera. “Dzimwe nzvimbo dzinozopinzwa varairidzi mabasa nekufamba kwenguva, zvichienderana nekuwanikwa kwemari nezvimwe zvekushandisa,” vanodaro Cde Mupfumira.
Gurukota redzidzo yepuraimari nesekondari, Dr Lazarus Dokora, vanoti varairidzi vanodarika 7 000 ava kana vakapinzwa mabasa, vanoita kuti chirongwa cheNew Curriculum chizadzikiswe.
“Takaisa zvichemo zvedu kudare reCabinet kuitira kuti PSC inge ichipinza mabasa vararidzi panzvimbo dzisina maticha,” vanodaro Dr Dokora. Muna Ndira gore rino, Hurumende yakambomisa hurongwa hwekupinza varairidzi mabasa nekuda kwekushaya mari.
Izvi zvinotevera danho rakatorwa nePSC gore rapera rekumbomisa kupinzwa kwevanhu mabasa muHurumende nedonzvo rekudzikisa huwandu hwemari yemuhoro yevashandi iyo pari zvino iri pachikamu che80% chehomwe yenyika yose.
Zvisinei, kune mamwe mapazi eHurumende anotenderwa kupinza vanhu mabasa zvichienderana nemamiriro anenge akaita zvinhu uye ichi ndicho chikonzero paine hurongwa hwekupinza maticha mabasa.
Zvakadai, masangano anomirira varaidzi anoti kunonoka kuri kuitwa kupinzwa basa mamwe maticha kuri kuita kuti basa rekudzidzisa vana zvakanaka rikanganisike sezvo varairidzi vari vashoma muzvikoro.
New Curriculum ine zvimwe zvidzidzo zvitsva seMass Displays neVisual and Performing Arts, izvo zvinoda kudzidziswa nevarairidzi vakafundira basa avo vakagara vasimo muzvikoro.
