Kwayedza
UMAA Institute College of Agriculture iri kusimudzira mabasa ekurima munyika kuburikidza nekufundisa vadzidzi kurima nekuchengeta zvipfuyo izvo zvinogona kuzovapa pundutso mune ramangwana.
Mukuru wemakoreji aya, Dr Cleopas Kundiona, vanoti vane shungu dzekuona vadzidzi vachibudirira muzvidzidzo zvavo kuti vagove neramangwana rakajeka.
“Tine Umaa Institute iri kuMsasa, kuHarare, Ummanian Kingdom iri kuMarondera kuchizoti vanoita makosi anosanganisira kugadzira motokari, kurima, zvemabhizimusi, kushanya, kubika, kutapa nhau nezvimwe zvakawanda.
“Chakanakira chikoro chino ndechekuti vadzidzi vanofunda muzvikoro asi vachizokwanisa kunoitiswa zvavanenge vadzidza (practicals),” vanodaro. Dr Kundiona vanoti vane mombe dzinodarika 400 nehuku dzinopfuura 5 000 izvo zvinoshandiswa muzvidzidzo zvekurima.
“Somuenzaniso, vanoita zvekurima vanoenda kumunda kunorima vachiona machengeterwo akanaka emombe, nguruve nekuziva zvirwere zvinobata zvipfuyo pamwe nekuziva misika yekutengesera zvirimwa zvavo kana zvipfuyo,” vanodaro.
Kwayedza yakaitawo hurukuro nevamwe vadzidzi vezvekurima vepaUmaa College of Agriculture avo vakarumbidza kukosha kwezvidzidzo zvemabasa emawoko.
“Tinoita zvidzidzo zvekurima zvinosanganisira kuchengeta zvipfuyo (animal husbandry), kuchenegta zvirimwa (crop husbandry) neFarm Engineering. Kurima kwakakosha nekuti ini ndinoda kuzovewo nepurazi rangu randinoita zvekurima nekuti ndakaona kuti mukurima mune mari, munhu wose anoda kudya kunobva muivhu,” anodaro Brenda Zhou (34).
Edwin Hwari (37), uyo ari kuitawo zvidzidzo zvekurima nemabhizimusi (Agri-Business) anoti kuburikidza neUmaa Institute akwanisa kudzidza nzira kwadzo dzinoita kuti apure mari yakapetwa nekuda kwekurima.
“Kurima handi dambe. Asi kungoti kunoda chikoro kuti munhu unge uchiona kuti uri kuita purofiti here kana kuti kwete. Pachikoro pano tinofara kuti tinowaniswa vadzidzisi vane madhigirii ekurima uye pane mikana yekuti tinoita zvatinenge tafunda.
“Tinodzidziswa zvakare nzira dzekuchengetedza masango kuti asaparadzwe nekuona kuti nzvimbo dzemafuro dzine kudya kunokwanirana nehuwandu hwezvipfuyo here,” anodaro Hwari.
Zvimwe zvezvirimwa zvavanofundiswa nezvazvo zvinosanganisira maringazuva, nzungu, nyemba, nyimo nefodya. Dr Kundiona vanoti pakoreji yavo pakafunda vadzidzi vezvekurima vanodarika 1 200.
“Hurumende yakandisimudzira kuti ndinge ndichisimudzira nyika. Tiri kufambirana nechirongwa cheHurumende cheZimAsset chekusimudzira zvizvarwa zveZimbabwe mumabasa emawoko. Dzidzo inhaka yemupakuriranwa,” vanodaro Dr Kundiona.
Vanoti kuburikidza neUmaa Institute, vadzidzi vanowaniswa zvitupa zvinotambirwa munyika muno nekunze apo vanenge vave kutsvaga mabasa pasi pebhodhi ravanonyoreswa naro bvunzo reInstitute of Commercial Management (ICM-UK).
“Zvinoitika ndezvekuti ICM iri kuUnited Kingdom inoseta zamanishoni ikoko rinonyorwawo nevadzidzi veko yotumira kuZimbabwe vadzidzi vedu vonyora totumira kuUK kwakare kuti rinomakwa.
“Saka mudzidzi wemuno anenge ava nechitupa chakangofanana neche ari kuUK. Izvi zvakanakira kuti hazvidhuriri mudzidzi kuti aende kunofunda ari kunze kwenyika,” vanodaro Dr Kundiona.
