Kwayedza
Gibson Mhaka
MUNYAYA inoshamisa zvikuru, murume ane makore 31 okuberekwa wekuEsigodini, kuUmzingwane, mudunhu reMatabeleland South, akasiya vagari veko vasina neremuromo zvichitevera kubata chibharo kwaanonzi akaita amai vake vekumubereka avo vane makore 64 okuzvarwa.
Murume uyu, uyo zita rake ratisingaburitsi senzira yekuchengetedza amai vake, anonzi akaita mashura aya apo amai vake vaive kutsi kwehope vakararadza nedoro.
Zvinonzi nemusi wa15 Chikunguru uye munguva dzehusiku, murume uyu akaenda kuimba yekurara yaamai vake ndokuwana gonhi risina kukiiwa.
Akabva asunda gonhi riya ndokupinda mumba.
Ava mumba umu, murume uyu anonzi akaona amai vake vakadhakwa nedoro uye varere vari voga pamubhedha.
Anonzi akabva avabhinya.
Mushure mekuita chisionekwi ichi, murume uyu anonzi akabva abuda mumba umu nekukasika ndokuenda kusina anoziva.
Amai ava vanonzi vakazonotaurira imwe nhengo yeNeighbourhood Watch Committee yemunharaunda mavo.
Nyaya iyi yakamhan’arwa kumapurisa uye mukuferefetwa kwayakaitwa, mwanakomana uyu akabva asungwa.
Murume uyu akamiswa pamberi pemutongi wedare reEsigodini Magistrate Court, Jeconia Prince Ncube, achipomerwa mhosva yekubata chibharo amai vake.
Haana kupihwa mukana wekuramba kana kubvuma mhosva iyi uye achadzoka mudare munguva pfupi inotevera achibva mutirongo.
