Kwayedza
Muchaneta Chimuka
VAKADZI vatatu vekuChitungwiza – avo vakakutsirana kurova mumwe musikana uyo vaimbodzidza naye kusekondari vachimupomera nyaya dzemakuhwa – vakaigochera pautsi zvichitevera kubatwa kwavakaitwa nemhosva nedare reko.
Diana Nyasha Muzondiwa (23) naPriscilla Thompson (22) vose veku Unit ‘O’ naMercy Tarugarira (23) wekuUnit G vakamiswa pamberi pemutongi wedare reChitungwiza Magistrate’s Court, Tendai Mutamba vachitarisana nemhosva yekurova Tatenda Bamusi (21) wepanhamba 14598 Unit ‘O’ kwekare.
Mutongi uyu akapa mumwe nemumwe wevatatu ava chirango chekugara mujeri kwemwedzi miviri asi ndokuisendeka padivi paine chitsidzo chekuti havafaniri kupara mhosva yerudzi urwu mumakore mashanu ari kutevera.
Mutongi Mutamba akazobhadharisa faindi ye$80 pamumwe nemumwe wavo uye kukundikana kwavo vanonopika mujeri kwemazuva makumi maviri.
Muchuchisi Farai Katonha akaudza dare kuti nemusi wa15 Chivabvu munguva dzemanheru, vatatu ava vakaenda kumba kwaBamusi vachinomubvunza makuhwa.
Bamusi akaudza dare kuti akaroverwa nyaya yemakuhwa.
“Vatatu ava ndaimbodzidza navo kuchikoro, saka pavakasvika pamba pedu, Diana akanditi titaure nyaya achibva andidzipa pahuro ndokutanga kurovera musoro wangu pasi vamwe vachindirovera pamadziro nepatafura zvikaita kuti ndizvimbe pahuma. Ndakatombofenda zvokuti ndakazongomuka muviri wangu wose watota nekudirwa mvura,” anodaro.
Bamusi akanorapwa kuchipatara uye magwaro ekwachiremba akabuda mudare seumboo.
Vatatu ava vakatongwa pasi pemutemo wekurova munhu weSection 89(1)(a) of the Criminal Law Codification and Reform Act, Chapter 9:23 Assault).
