Kwayedza
Tendai Gutikwa
MUTONGI wedare reNyanga Magistrate Court abvisa mutongo wefaindi yainge yabhadhariswa mumwe mugari wemunzvimbo iyi nasadunhu weko achipomerwa mhosva yekupfeka ngowani tsvuku.
VaPeter Makunura (76) vekwaSabhuku Tamunesa vakapotera kudare iri mushure mekunge muzukuru wavo mudiki apomerwa mhosva yekutyora tsika dzenzvimbo iyi nekupfeka ngowani tsvuku munguva yekunaya kwemvura.
Pakanzwikwa nyaya iyi mudare raSadunhu Fungai Mushonga, muzukuru waVaMakunura akaripiswa mbudzi ina, huku mbiri neUS$20.
Akabatwazve nemhosva yekuzvidza dare rasadunhu uyu.
Sadunhu Mushonga vakabva vatumira nhume yavo kunotora zvipfuyo zvaVaMakunura.
Maererano netsika nemagariro enzvimbo iyi, hazvitenderwe kupfeka chero chinhu chitsvuku munguva yekunaya kwemvura.
Izvi zvakaitika munaNdira.
Vachipa mutongo wavo nemusi weChishanu svondo radarika, mutongi wedare reNyanga Magistrate Court, Muzvare Notebulgar Muchineripi vanoti Sadunhu Mushonga vakatadza kutsanangura zvikonzero zvakaita kuti vape mutongo wavo.
Pamusoro pezvo, Muzvare Muchineripi vanoti Sadunhu Mushonga vakatadza pakudaidza kwavakaita muzukuru waVaMakunura kuti amiswe pamberi pedare ravo asina mubereki kana muchengeti zvinova zvisiri pamutemo.
“Mutemo wechivanhu nemitemo yenyika ino haitenderi zvakaitwa naSadunhu Mushonga. Vakatadza kupa zvikonzero zvine musoro zvekuti sei vakasvika pamutongo uyu. Vakadaidza mwana vasina kumupa mukana wekuve nemuchengeti wake izvo zvisiri pamutemo,” vanodaro Muzvare Muchineripi.
VaMakunura vakanga vakamirirwa nemagweta eZimbabwe Lawyers for Human Rights – VaKelvin Kabaya naMai Peggy Tavagadza – avo vakasvitsa chikumbiro chekuti dare riongorore kutongwa kwenyaya iyi kwakaitwa naSadunhu Mushonga uye ndokukumbira kuti mutongo uyu usendekwe padivi.
Magweta aya anotiwo danho rakatorwa naSadunhu Mushonga rekutumira nhume yavo kuti itore zvipfuyo zvaVaMakunura asi ivo vasina chekuita nenyaya iyi hazvisi pamutemo.
“VaMakunura havana kumbobvira vapinda mudare iri uye havana kumboshevedzwa kuti vauye kudare iri nekudaro izvi zvaive zvisiri pamutemo.
“Mutongo wakapihwa naSadunhu Mushonga panyaya dzine chekuita nemwana haufambirane nezvinodiwa pasi pemutemo uye unokonzera kuvhunduka,” anogaro magweta aya mumagwaro avo ari mudare.
Muzvare Muchineripi vakaudza Sadunhu Mushonga kuti vadzosere zvipfuyo zvaVaMakunura zvavakatora mukati memazuva manomwe.
