Kwayedza
Daphne Machiri —
VARIMI vari kuyambirwa kuti vasashandisa mishonga yavanogadzirira vega mukurwisa zvirwere zvakasiyana zvinobata zvirimwa, kusanganisira makonye aiita mukurumbira wekunetsa eFall Army Worm, sezvo kuita kwakadai kunokanganisa goho uye kune njodzi huru kuutano hwavo.
Mashoko aya akataurwa svondo rapera nemukuru anoona nezvetsvakurudzo nekuvandudzwa kwembeu (global head researcher and development) kukambani huru inouchika mbeu munyika muno yeSeed Co – Professor John Derera – kuRattary Arnold Research Station kuShamva apo paive negungano rekumema zvirimwa zvakarimwa nemhando yepamusoro.
Vanoti kune vamwe varimi vari kugadzira mishonga yavo voga yekuuraya makonye aya.
Kambani yavo, vanodaro, iri mushishi yekuita tsvakurudzo yekuti makonye aya angaparadzwa sei.
“Gonye reFall Army Worm rakanetsa zvakanyanya muzhizha regore rino. Gonye iri rinoparadza zvirimwa zvinova zvinozoita kuti goho remurimi riderere. Muhurukuro nevarimi vazhinji takaona kuti havana ruzivo rwakakwana pamusoro pegonye iri uye vamwe vakatanga vachingoritora segonye ratinosingoona makore apfuura ese aya. Vazhinji vakazoshamisika nehuwandu hwaro nekuparadza kwarinoita,” vanodaro.
Vanoenderera mberi vachiti, “Vamwe varimi vaitengawo mishonga asi vanga vasina ruzivo rwekuti mishonga yacho inoshandiswa sei. Vamwewo vaisaziva kuti mishonga yacho inowanikwa kupi uye vasina mari yekutenga mishonga yacho. Varimi vazhinji vakazopedzisira vave kugadzira vega mishonga vachisanganisa munyu nesipo dzekuwachisa, surf kane nemukaka,”
vanodaro Prof Derera.
Vanoti vari kuita tsvakiridzo vakabatana
nechikamu chinoona nezvekurima cheDepartment of Crop Science paUniversity of Zimbabwe nedonzvo rekutsvaga mushonga unouraya makonye aya nekukasika asati aparadza zvirimwa.
“Tiri kubatanawo nemamwe makambani ari mune zvemishonga yezvekurima akadai seAgro Chemical nePolychem. Tsvakurudzo yedu ichatitorera mwaka miviri. Zvakare tichatorawo mishonga inoshandiswa kunyika dzakadai sekuBrazil pamwe neiri muno yatinoshandisa kuuraya makonye aye kuti tiione kuti tinovandudzwa sei, vanodaro.
Vanoti havakurudziri varimi kuti vashandise mishonga yavanogadzira voga sezvo munyu uri kushandiswa nevamwe uchiomesa zvirimwa uye unokanganisa mamiriro nechikafu chemuvhu.
Muhurukuro neKwayedza, VaMusiwa Marongedza avo vakarima mwaka uno vari pasi pechirongwa cheCommand Agriculture kuMuzarabani kuMashonaland Central vanoti vakasangana nedambudziko remakonye aya.
“Gonye iri rakapinda mumunda zvaityisa. Ini ndakaita zvekutsvaga vanhu vainhonga nemawoko mumunda vachiuraya. Nzvimbo yatiri yeMashonaland Central iRegion 2B inonaya mvura zvakanyanya. Asi nekuda kwembeu yandakasarudza yeSeed Co SC627 Shumba inova inorwisa zvirwere pachezvayo, ndiri kutarisira goho guru,” vanodaro.
Vanoti chishuwo chavo sevamwe varimi vose ndechekuti pawanikwe mushonga wekupedza makonye aya.
Makonye eArmy Fall Worm, kunze kwemuZimbabwe ari kuparadza zvirimwa zvakare kune dzimwe nyika dziri mudunhu reSadc.
