Kwayedza
ZVIDZIDZO pachikoro cheZimondi Secondary School, kwaMambo Nyoka kuChikomba, zviri kutadza kufamba zvakanaka sezvo vabereki “vakavharisa” chikoro ichi vachiti aimbova mukuru wacho, uyo akambomiswa basa ndokuzodzoka ava murairidzi, ane huwori.
Vakuru vezvedzidzo kudunhu reMashonaland East vanotsinhira nyonga-nyonga iri kutadzisa vana kudzidza zvakanaka pachikoro ichi.
Aimbova mukuru wechikoro ichi, Isaac Huruva (48), anonzi akakumurwa nyembe ndokungoitwa mudzidzisi nekuda kwezvinhu zvisina kumira zvakanaka pachikoro.
Zvinonzi pane mari inosvika $12 600 isati yajekeswa mafambiro ayakaita iyo inosanganisira yakange yabhadharirwa vana kuti vanyora bvunzo dzeO-Level.
Mumwe wevabereki vakataurwa navo, VaCephas Matova (48) vanovawo muzvinabhizimisi munzvimbo iyi, vakapika kuti havambofa vakabvumidza vana vavo pachikoro ichi kusvika mudzidzisi uyu abviswa.
“Huwori hwepachikoro apa hwakabuda kare apo nyaya dzacho dzaingotsikwa-tsikwa, kusvika Mambo Nyoka vakazopindira pakazouya maauditors eHurumende zvikabuda pachena kuti pakabiwa mari,” vakadaro VaMatova.
VaTafireyi Chipere (50) vanova sachigaro wekomiti yeSchool Development Committe yepachikoro apa vakatsinhira nyaya yekuti vana vakambomira kuenda kuchikoro.
“Takawirirana kuti vana vedu vasaende kuchikoro kusvika Huruva abva, hazvinei kuti bazi rezvedzidzo rakamubvisa pachigaro chekuva mukuru wechikoro,” vakadaro VaChipere.
Vanoti Huruva akauya pachikoro ichi mugore ra1987 achingovawo mudzidzisi ndokuzokwidziridzwa kuitwa mukuru.
“Hapana budiriro yakavapo, dzimba dzakatanga kuvakwa nevamwe ipapo dzave kutodhirika uye dzekudzidzira hadzina madhoo pachikoro chine vadzidzisi 8. Izvozvi vamwe vabereki vave kubvisa vana vavo vachienda kune zvimwe zvikoro zvekure seMarondamashanu Secondary kunova makiromita gumi neHolly Cross Manyene Secondary uko kunove makiromita 12,” vakadaro VaChipere.
Chikoro ichi chine vana vanodarika 250.
Dzimba dzekudzidzira dzinokwana sere hadzina zvigaro nemateburu uyewo madziro akatsemuka-tsemuka.
“Tine imba yeScience Lab yakatanga kuvakwa makore masere akadarika apo marata nemapuranga acho asingazivikanwe kwaakaenda. Dzimba dzose dzekudzidzira mabhuroko masere ane makamuri maviri- maviri kureva kuti pamwe chete i16,” vakadaro.
“Pachikoro ichi vana vave kufoira zvikuru,” vakadaro.
Mambo Nyoka, VaNewton Matizha (60), vanoti vabereki havachada aimbova mukuru wechikoro.
“Dambudziko repachikoro apa rakatanga mugore ra2006 apo Huruva akaitwa acting headmaster, zvinhu zvose zvakatanga kudzikira. Tine mwana wekwaChako akatozopondwa ave kuenda kuchikoro cheHolly Cross Secondary kunova kure.
“Ndine magwaro eaudit yakaitwa nevakuru vekubazi redzidzo anoratidza kuti mari isina kuonekwa mafambiro ayakaita i$12 635 iyo yaisanganisira yekuti vadzidzi vanyore mazamanishoni,” vakadaro Mambo Nyoka.
Pane nyaya zvakare yezvidhinha 3 000 zvepachikoro apa zvakatsakatika,” vakadaro Mambo Nyoka.
Mambo Nyoka vanoti zvakare pachikoro apa pakashandisa vana kucheka huswa munhandare yenhabvu ndokuzonzi basa iri rakaitwa netirakita yekuhaya.
“Inyaya dzose dzatinadzo uye vakuru vedzidzo kuno vave kuzviziva vanosanganisira Chikomba DEO VaNgoni Mujuru naPED (Provincial Education Director) veMashonaland East VaChristopher Chihota,” vakadaro Mambo Nyoka.
Pachikoro apa panonzi pakauya vakuru vekubazi rezvedzidzo nemusi wa19 Ndira asi zvakabuda muongororo nehurukuro hazvina kuzivikanwa.
“Huruva anonzi aiva akambomiswa basa kubva mumwedzi waGunyana mugore ra2015 kusvika 9 Zvita ndokudzoka pakavhurwa zvikoro apo vabereki vakati havadi kumuona,” vakadaro Mambo Nyoka.
Chikoro ichi chiri kutungamirirwa naMai Alice Runesu vachitevedzerwa naMai Ellen Manyani uyewo mudzidzisi mukuru ari VaRufaro Matsika.
Huruva paakaonekwa neKwayedza akaramba kutaura nekuda kwemutemo webasa rake.
VaChihota vanoti nyaya yepachikoro ichi vanoiziva uye iri kugadziriswa. “Inyaya yatinoziva, DEO wedu ari mubishi kuigadzirisa zvekuti panopera svondo rino tinenge tasvika pakuwirirana. Vabereki takataura navo kuti varege vana vaende kuchikoro,” vakadaro VaChihota.
