Kwayedza
VANA vechikoro, hounoi mukana wekupota muchitumira mibvunzo yenyu kuKwayedza tibatsirane kuti Shona ireruke.
Tumirai mibvunzo yenyu kuMupepeti nenhare dzinoti +263 714 200 007 kana e-mail inoti: [email protected] kana [email protected].
Taura zita rako rizere, chikoro chako, giredhi, nenzvimbo inowanikwa chikoro chako.
MHINDURO DZEMIBVUNZO YESVONDO RAPERA:
Tiudze rimwe zita rezvinhu izvi:
Semuenzaniso, rimwe zita redoro ndihwahwa kana kuti mhamba.
1. Rimwe zita rerukukwe (bonde)
2. Rimwe zita regudo (bveni)
3. Rimwe zita reingwe (mbada/nyarugwe/mukwengwere/chigwi)
4. Rimwe zita rehukwana (nhiyo)
5. Rimwe zita rinoreva muridzi wechinhu (mwene)
* * *
Izvi ndizvo zvakanyorwa nevamwe vana:
Knowledge Nhondova ari muForm 2 paMufakose High School, kuTriangle, kuChiredzi akati:
Mwana mucheche asina mazino akafa anovigwa ari pai, panzvimbo ipi uye nevanhu vapi?
(Anovigwa akaputirwa nemachira, kunzvimbo ine hunyoro semubani kana pedyo nerwizi uye izvi zvinoitwa nechembere bedzi.)
* * *
Richard Dovi wemuForm 4 paSt James Zongoro, kwaMutare ndokuti:
Pazvipfeko zvaipfekwa kare tinonzwa kuti vanhurume vaipfeka nhambwa ko vanhukadzi vaimbopfekawo chiiko?
(Vaipfeka mhapa iyo yaivhara mberi neshure.)
* * *
Learnmore Hamadzewawa uyo ari muForm 4 paCropus Christ High, kuKuwadzana 3 muHarare akati:
Vabereki vakafirwa nevana vanonzi chii? (Rega timbotsvaga)
* * *
