Kwayedza
VANA vechikoro, hounoi mukana wekupota muchitumira mibvunzo yenyu kuKwayedza tibatsirane kuti Shona ireruke. Tumirai mibvunzo yenyu kuMupepeti nenhare dzinoti +263 714 200 007 kana e-mail inoti: [email protected] kana [email protected]. Taura zita rako rizere, chikoro chako, giredhi, nenzvimbo inowanikwa chikoro chako.
* * *
MHINDURO DZESVONDO RAPERA:
Tsanangura zvinoreva zvirevo zvinotevera:
1. Kutenderedza musoro
2. Kutemesa musoro
3. Kutyora mapfupa
4. Kudya moto
5. Kushaisa hope
6. Kutsvukisa maziso
MHINDURO:
1. Chinhu chinonetsa kuchigadzirisa.
2. Kushaya zano rekuita nechinhu.
3. Zvinhu zvinonetesa kana kushaisa zano.
4. Kupenga kana kugumbuka.
5. Kunetsekana nechinhu.
6. Kugumbuka.
* * *
ZVAKANYORWA NEVANA:
Makadii Mupepeti? Ini ndinonzi Elismore Gunda, ndiri Form 4 paMutekedza Secondary School kwaSadza, kuNjanja. Ndinoda kubvunza kuti ndeupi musiyano uripo pakati pegonzo nembeva?
(Gonzo rinowanzogara panogara vanhu semumba uye haridyiwe asi mbeva kazhinji haigare mumba asi ichidyiwa.)
* * *
ZVEKUITA SVONDO RINO:
Pane zvirimwa zvakawanda, uye zvinobereka nenzira dzakasiyana-siyana.
Zvimwe zvirimwa zvinotambarara kana kutanda, zvimwe zvinoitira vana vazvo pasi pevhu, zvimwe zvichiberekera vana vazvo pamusoro pevhu.
Tiudze zvirimwa zvaunoziva zvinoberekera vana vazvo muvhu.
* * *
Mhinduro muKwayedza svondo rinouya.
***