Kwayedza
“HUNDI KWANDIRI” naPeldah Hove (55-64)
Ongororo (Enderero mberi):
Vanhu vaya vari kutaura nhaurwa. Apo Netsai anonotsveta sadza vanobva vaigura “sevaya vabatwa miromo nemagetsi” (61). Kutambudzika nezviri kuitika mumaziso aNetsai kunoonekwa apo zvinonzi shaya dzake dzakaputana “seuya akarudzwa nerufu rwemurume” (62-63) ganda rekumeso kwake rikaita “sorouya aizora mafuta okusandura ganda akazomashaya” (63).
Mudzimai anoonekwa achinyeta-nyeta nekudzungaira nekicheni “kunge mucheche apiswa nomuteuro” (63).
Kudimikira kunoshandiswa asi hakuzosviki pachinhano sechashandiswa enzaniso. Gwisai ainge ashatiriswa chaizvo nezvainge zvaitwa nemwanasikana wake mukuru akanzwika “iro riri rino rasha rinobhebha” (55).
Anoendera mberi achipopota achiti Tambu ainge achiri mudiki chaizvo izvo anoti “aine mukaka pamhuno . . .” (55). Sekuona kwake, mukadzi wake asi kuti ndeye kunyepedzera izvo zvinonzi, “Iyi ndiyo yaaiti misodzi yegarwe” (56).Anopopota achiti mukadzi wake ndiye aiswera nemwana iye achivirirwa zvake ari kubhawa iye Netsai “nyakutumbura muchiruka manera” (56). Akafunga nezvemari yaakaparadza mukuendesa Tambu kuchikoro, Gwisai anonzwa kurwadziwa zvikuru munhu odemba achiti, “Ndingadai ndisina kudira mari yedikita rangu mudziva mhani” (57).
Netsai achinzwa kudai, nyoka dzake dzinogwamba pasisina chaanzvenga nekuti, “Kana yadai bedzi yaitodya nyakusunda akanya ndove akasiya nhiyo muura” (57).
Mukupopota kunoita Gwisai, rume rinoenda mubhedhuru kunotora mboma kuti rigorovesa nayo Netsai uyo anoti achiona izvi “hana yake yakabva yamuudza kuti raaive adya ndiroro” (58). Tambu ainge ava kuda kupedza chikoro zvino ndipo paanobva abata pamuviri izvo Gwisai anopopotera mudzimai wake achiti, “Kubva wateurisa mwana muto asvika, shuwa? (59).
Panouya babamukuru Mandeya kuzoona munin’ina wavo, vaviri ava zvavanokurukura hazvizikanwi naSekai. Chaanoziva ndechekuti kungoenda kwakaita Gwisai kwaakaenda ndikoko izvo zvinonzi, “Gwisai ndiye kwakaenda imbwa ndiko kwakaenda tsuro” (61-62).
Kunyangwe zvazvo nyaya iyi yakakomba, panombowanikwa mukana wekushandiswa kwesekerambabvu inovava senduru yegarwe (bitter sarcasm). Muenzaniso unotevera unoratidza musambo uyu. “Ini kukusha mari yangu for nothing kubvira Grade 1 dakara nhasi Fomu 4? Pese apa kufira kuti Tambu agoita kosi yevarume bedzi” (57).
Gwisai anoshandisa mazwi akasimba pakutuka Netsai. Izvi tinozviona apo anotuka mukadzi wake achiti, “Heya ndinoti ndigere nomukadzi mumba izvo ndigere nenyoka? Chirakapiti! Mhungu! Ndigere nenyasire yemhombwe, muroyi anoroya rakacheka nyika” (56).
Tinomuonazve achishandisa mutauro wokutuka apo anoti, “. . . zvaunonditi pwapwa” (56), “pfutseki, usakosora wakafunira ruromo ruzere inda dzemakunguo” (57). Ambobva kuti “. . . irwo ruromo rwako rwunenge shure kweimbwa zvere” (57).
Nyaudzosingwi dzinobetsera kuti tione maitikiro ezvinhu sepapeji 55 tichangotanga kuverenga kanyaya aka. Zvinonzi, “Murume akabva akaringwa nemate ndokumbokosora ndiye tuzuzu. Akabva angoti maziso dhe pamukadzi seaida mhinduro yezvaaive ataura”.
“KUFUNDISA MWANA” naEmma Chitehwe (65-68) Nyaya Yacho:
VaMuchineripi vari kukakavadzana nemudzimai wavo.
Enderero mberi svondo rinouya.
