Kwayedza
Abel Ndooka
CHIKWATA chenziyo dzechitendero cheMasimba Edenga Gospel Singers chakadzokera mustudio umo chiri kushanda kubika dambarefu racho rechi12.
Muhurukuro neKwayedza, nhengo yechikwata ichi – Tendai Mandipira – anoti vari mushishi kubika dambarefu idzva iro vanotarisira kuzoparura mwedzi inotevera.
Dambarefu iri rinotevera rechi11 rinonzi Ndirangarireiwo Baba iro Masimba Edenga yakabura panguva iyo Zimbabwe yairwisa denda reCovid-19.
“Tadzoka zvekare mustudio, tiri kubika dambarefu redu idzva rechi12 iro tinotarisira kuzoparura kupera kwegore rino.
“Vatsigiri vedu vanogara vachitipa manyemwe, ndivo vanotisunda kuti tirambe tichinyora nziyo nekutsikisa saka ndicho chimwe chezvikonzero tadzokera mustudio kuti tibike dambarefu idzva tivapakurire.
“Dambarefu ratiri kubika iri mutakunanzva chaiwo nekudaro kuvatsigiri vedu ndinoti gadzirirai kuzonakirwa nemhanzi inosimudzira uye inovaka yatiri kukubikirai. Rambai muchitsigira Masimba Edenga,” anodaro Mandipira.
Group director weMasimba Edenga – Misheck Mukumire – anotiwo chikwata chavo chave kubatana nemakambani izvo zviri kuchiona chichinonyaradza vanenge varasikirwa nehama dzavo parufu.
