Kwayedza
Lizzy Mushoriwa
Murume samusha akashaya pekupinda nekunyara mudare apo mudzimai wake akamufumura achiti zimbavha remakoko rinoba zvinhu zvekubasa richipa shamwarikadzi yaro kuti izvitengese.
Raina Taruvinga akaudza mutongi wedare reHarare Civil Court, Larzin Ncube, mashoko aya mushure mekunge amhan’arirwa nemurume wake, Edward Mupfundi uyo ari kumupomera mhosva yekumushungurudza. Mupfundi anoti Taruvinga ari kumuonesa pfumvu kumba zvose nekubasa.
“Changamire, ndauyawo pano nemukadzi uyu, mudzimai wangu asi ane hunhu hwakashata chaizvo. Anondishungurudza zvekuti ane tsika yekubvarura hembe dzangu tikangonetsana uye anoudza vana kuti vanditevere kwese kwandinenge ndichienda. Izvozvi akadzinga mumwe mwana wangu,” anodaro Mupfundi.
Anoti mudzimai wake ane tsika yekuuya kubasa kwake achiita mhirizhonga.
“Anouya kubasa kwangu achiita mhirizhonga uye achiudza vakuru vangu kuti ndiri mbavha, ndinoba zvinhu pabasa zvinova zvave kunditadzisa kushanda zvakanaka. Zvakare, anoudza vamwe vandinoshanda navo kuti ndakamuzadza chirwere. Hama dzangu chaidzo haadi kudziona saka ndibatsireiwo ishe wangu,” anodaro murume uyu.
Taruvinga anopikisana nemurume wake achiti: “Ndinopikisana nechikumbiro chavo baba ava, havandipe mari yechikafu saka ndichizoenda kubasa kwavo. Taifanira kunotorwa ropa asi akaramba, ndipo pandakazoona kuti akandizadza chirwere.
“Mwana handina kumudzinga ini, ndiye akamuti aende kunogara kwatete. Panyaya yekuba iyi, ehe ndakavaudza vakuru vake nekuti imbavha hakusi kunyepa. Uyezve ndinorwadziwa kuti zvimwe zvinhu zvacho zvaakaba akazvipa shamwarikadzi yake kuti izvitengese, saka ndakanovaudza,” anodaro.
Mutongi Ncube akapa Mupfundi gwaro redziviriro.
