Kwayedza
MASHOKO erwiyo rwenyika yeZimbabwe – Simudzai Mureza weZimbabwe – akanyorwa nemushakabvu Muzvinafundo Solomon Mangwiro Mutswairo ndokuzobatanidzwa kuva rwiyo naFred Changudega. Rwiyo urwu rwakatsiva rwaivapo, Ishe Komborera Africa, munaKurume 1994. Nechinangwa chekuti vana neveruzhinji vanyatsobata rwiyo urwu, Kwayedza inorwuburitsa rwose. Dada nerwiyo nemureza wenyika yako!
* * *
Simudzai mureza wedu weZimbabwe
Yakazvarwa nemoto weChimurenga;
Neropa zhinji ramagamba
Tiidzivirire kumhandu dzose;
Ngaikomborerwe nyika yeZimbabwe.
Tarisai Zimbabwe nyika yakashongedzwa
Namakomo, nehova, zvinoyevedza
Mvura ngainaye, minda ipe mbesa
Vashandi vatuswe, ruzhinji rugutswe;
Ngaikomborerwe nyika yeZimbabwe.
Mwari ropafadzai nyika yeZimbabwe
Nyika yamadzitateguru edu tose;
Kubva Zambezi kusvika Limpopo,
Navatungamiri vave nenduramo;
Ngaikomborerwe nyika yeZimbabwe.
* * *