Kwayedza
Leonard Ncube
MUDZIDZISI wekuVictoria Falls atongerwa kugara mujeri kwemakore maviri mushure mekubata-bata muviri wemwana weGrade 7 vari mukirasi.
Austin Shoko (43) wepanhamba 6549 Mkhosana, uyo aive mudzidzisi pachikoro cheChinotimba Primary School, akabatwa nemhosva yekubata-bata kasikana kane makore 13 okuberekwa.
Shoko aive murabhoritari nemusikana uyu nevamwe vadzidzi apo akatanga kumubata mazamu munaKukadzi gore rino.
Akaramba mhosva iyi paakamira mudare reVictoria Falls Magistrate Court pamberi pemutongi Muzvare Linda Dzvene asi umboo hwakaburitswa hwakamuroverera.
Mutongi akatemera Shoko kugara mujeri kwemakore maviri ndokuzosendeka mwedzi mitanhatu padivi nechitsidzo chekuti haafanire kupara imwe mhosva yerudzi urwu mukati memakore mashanu.
Shoko achagara mujeri kwemwedzi 18.
Muchuchisi Mai Portia Moyo vakaudza dare kuti Shoko akapara mhosva iyi nemusi wa18 Kukadzi nenguva dza7 mangwanani.
Shoko akabata mwana uyu ndokumupuruzira pasina kubvumirana.
Nyaya iyi yakamhan’arwa kumapurisa zvikazoita kuti Shoko asungwe.
