Kwayedza
Danisa Masuku
VARINDI kana kuti magadhi vepaPelandaba Skills Centre iri kuBulawayo vari kurapwa maronda mushure mekunge mbavha mbiri dzavamwaya mushonga une mhiripiri kumaziso ndokuzovazvambaradza nechamboko uye simbi.
Nyaya iyi yakaitika munguva dzemasikati nemusi weChitatu chadarika.
Vanyeveri vanoziva nezvenyaya iyi vanoti magadhi aya akanzwa ruzha panze achibva aenda ndokunzwa musuwo uchisundwa.
“Vakaswededza tsoka dzavo pedyo nemusuwo apo matsotsi aya akange ari kushandisa chisimba mukuvhura musuwo asi varindi ava vakaramba vakasimba vachivhara musuwo uyu,” anodaro mumwe munyeveri.
Mushure meizvi, mbavha idzi dzakamwaya mushonga waive nemhiripiri nepaburi izvo zvakaita kuti magadhi aya aregedze musuwo.
“Mbavha idzi dzakabva dzapinda ndokutanga kuita zvijana zvekurova magadhi aya muviri wese nechamboko vachiti vaida kuti vavape mari. Vakavarova zvekare mesimbi,” anodaro.
Magadhi aya anonzi akaridza mhere izvo zvakaita kuti mapurisa akanga ari kufamba-famba munzvimbo iyi auye ndokubva vaona mbavha idzi dzichitiza uye hadzisati dzabatwa.
Magadhi aya akakuvara zvikuru uye akaendeswa kuMpilo Central Hospital kunorapwa.
Mutauriri wemapurisa muBulawayo, Inspector Abednico Ncube, vanotsinhira nezvenyaya iyi.
“Ichokwadi tiri kuferefeta nyaya yembavha dzakamwaya mhiripiri magadhi epaPelandaba Skills Centre vakasiya vavarova zvikuru,” vanodaro.
“Kana paine ane ruzivo nezvenyaya iyi zvingabatsira kuti vanhu ava vasungwe anotibatawo panhamba dzinoti WhatsApp 078 792 8015 kana kufona paq09 60358.”
