Kwayedza
SANGANO reZimbabwe Commercial Farmers Union (ZCFU) rinoti zvakakosha kuti varimi vagare vakanyoresa zvirimwa nemisha yavo pasi pezvirongwa zvemainishuwarenzi sezvo zvichizovabatsira zvikuru kana vachinge vasangana nenjodzi yakaita sekuparadzwa kwazvo nemvura inenge ichinaya iine dutu kana kuti chivhuramahwe.Kurudziro iyi inotevera kuparadzwa kwakaitwa misha nezvirimwa zvakawanda kumativi mana enyika nguva yadarika nemvura yaiva nedutu nechivhuramahwe.
Mukuru weZCFU, VaWonder Chabikwa, vanoti zvinobatsira kuti varimi vagare vakagadzirira matambudziko avanogona kusangana nawo mubasa ravo kwete kuzoyeuka bako vanaiwa.
“Ikurudziro yedu kuti varimi vagare vakanyoresa mainishuwarenzi ezvirimwa zvavo zvose kusanganisawo nezvipfuyo zvakaita semombe, mbudzi, huku, hwai nemisha chaiyo. Tinofanirwa kuzvinyoresa kuitira kuti kana tawirwa netsaona tizobatsirwa kungava kuvaka misha mitsva kana kubhadharwa zvirimwa zvedu zvinenge zvaparadzwa,” vanodaro.
Vanoti chinofanirwa kuitwa nemurimi chete kuenda kumakambani anopa mainishuwarenzi angava emisha kana zvipfuyo nezvirimwa vonotaura navo vobvumirana pane mari inodiwa kuti ibhadharwe.
“Ingaite semari yakawanda yekubhadhara muchirongwa ichi asi kukosha kwazvo kunozoonekwa chete kana varimi ava vawirwa nedambudziko. Asiwo tinopawo chenjedzo kuvarimi vedu kuti vangwarire makambani emainishuwarenzi sezvo kwava nemamwe echitsotsi aripo pakubira varimi. Saka varimi vedu ngavadyidzane nemasangano evarimi nevarimisi vacho vari mumatunhu avanogara,” vanodaro VaChabikwa.
Zvakadai, vanoti kune varimi vakawanda vakaparadzirwa zvirimwa zvavo pamwe nemisha nemvura yaiva nedutu.
“Tine varimi vedu vakarasikirwa nezvirimwa zvinosanganisira chibage nefodya uye nemisha izvo zvakaparadzwa zvave kukonzera kuti vatange kutsvaga zvikwereti kumabhanga nekuvanhu vakazvimirira. Kudai vakanga vakanyoresa kumakambani einishuwarenzi vaingobhadharwa chete zvirimwa zvavo nekuvakirwa mimwe misha kana kutengerwa zvimwe zvipfuyo,” vakadaro.
Varimi vakasangana nenjodzi yekuparadzirwa zvirimwa, zvipfuyo nemisha vari kunzvimbo dzinosanganisira Chegutu, Mhondoro, Hurungwe, Kadoma neNorton.
VaLangton Muzungu (50) vanove murimi akagariswa patsva neHurumende kupurazi reNyagori Estate, kuNorton vanoti vakaparadzirwa chibage chavo mumunda wakatandavara hekita imwe chete pamwe chetewo nefodya.
“Hapana chandakasara nacho, ndave kutorimira zvirimwa izvi pasi ndidyare zvangu bhinzi chaidzo kana zvimwewo zvirimwa zvinokurumidza kusvika,” vanodaro.
Mumwewo murimi akasangana nedambudziko iri dziMai Plaxedes Chingondi (60) vekupurazi reRock kuNorton kwakare.
“Munda wangu mahekita maviri echibage wakaparadzwa, izvozvi ndave kutotsvaga kubatsirwa nekuti handina pekutangira,” vanodaro.
