Kwayedza
Natalie Chasiya
MUKADZI wekugerwa vhudzi rake mumusoro neshamwarikadzi yemurume wake mushure mekunge vatosvorana akazokwidza nyaya iyi kudare redzimhosva. Paidamoyo Sithole akaendesa Grace Mukabeta kuHarare Civil Court achida gwaro rerunyararo. Akaudza mutongi wedare iri, Gamuchirai Siwardi, kuti: “Mukabeta anouya kumba kana achiziva kuti murume wangu aenda kubasa kana kuti afamba, ondirova nekundituka. Rimwe zuva akandicheka vhudzi rangu nebanga remumba mangu.”
Sithole akaenderera mberi achiti Mukabeta anomushungurudza izvo zvakazoita kuti mapurisa amuti atsvage gwaro rerunyararo kumatare edzimhosva.
“Shamwarikadzi yemurume wangu iyi yaiuya kumba payadira zvikazoita kuti nditizire kumapurisa ayo akanditi ndizotsvaga gwaro rerunyararo. Ndiko kusaka ndapotera kuno kudare kuti ndidzivirirwe,” akadaro Sithole.
Mukabeta haana kuenda kudare kuti anopa divi rake panyaya iyi. Mutongi Siwardi akapa gwaro rerunyararo kuna Sithole.
