Kwayedza
Abel Ndooka
MUIMBI wechitendero, Mary Zinyimo, – uyo vazhinji vanonyanya kuziva saZee VokwaMhiribidi – anoti haasi kuzorora pakutsikisa mhanzi sezvo agarira kuparura dambarefu rake idzva.
Kubva atange kutsikisa mhanzi mugore ra2017, Zee akwanisa kubura madambarefu mashanu asi akazotanga kuita mukurumbira mugore ra2019 apo akabura kambo kainzi Ngazvindipfure.
Gore raitevera ra2020, kambo kake kainzi Hamuendi Kunorara kakanetsa kakapedza kari pechitatu pachirongwa cheGospel Top 50 kuchiti muna2022 kambo kake Reitumetsu (Tiri kufara) kakahwina mubairo wegospel song of the year.
Gore radarika munaGunyama, Zee akahwina mubairo weMasvingo People’s Choice Award, kuMasvingo.
Muhurukuro neKwayedza, Zee anoti kusimuka kwaita zita rake mune zvekuimba kuri kumusunda kuti arambe achishanda nesimba achibura nziyo itsva.
“Ndinonzwa manyukunyuku kuti basa rangu randiri kuita riri kugamuchirwa nevatsigiri vemhanzi, saka zvinondisundawo kuti ndirambe ndichishanda nesimba ndichibura mhanzi inofadza nekukomborera.
“Ndingange ndichihwina mibairo iyi, asi chinhu chikuru hacho kwandiri kuparidza shoko reMusiki wedu, ndinofara chaizvo kuti ndiri kumushandira uye chipo chaakandipa ndiri kuchishandisa nemazvo,” anodaro.
Muimbi uyu kubva atange kutsikisa mhanzi akwanisa kushanda nevamwe vaimbi vanosanganisira Agatha Murudzwa, Trymore Bande naZolosko Vatsay wekuBotswana.
Anoti kushanda nevamwe vaimbi uku kwamubatsira zvikuru mune zvemhanzi sezvo adzidza zvakawanda kubva kwavari.
“Mhanzi haisi yemuimbi mumwe chete kwete. Sevaimbi tinofanirwa kubatana toshanda pamwe chete kuti tikure mubasa iri.
“Ini ndinofara zvikuru kuti ndakakwanisa kushanda nevamwe vaimbi uye kushanda kwandakaita navo kwakandibatsira kuti ndikure semuimbi uye ndiri kukura ndiri kudzidza zvakawanda zvekuti ndave kukwanisa kusvika padanho rekubatsirawo vamwe vaimbi vari kutanga zvemhanzi,” anodaro Zee.
