Kwayedza
Kingstone Mapupu
MADZISHE nemasabhuku ekudunhu reMashonaland West vakavamba chirongwa chekukurudzira kurimwa kwezvirimwa zvetsanga duku izvo zvinotivirira kuzuva senzira yekudzinga nzara. Chirongwa ichi chiri kutsigirwa naMambo Ngezi, VaPeter Pasipamire, vanovazve sachigaro wemadzishe kudunhu reMashonaland West.
Mambo Ngezi vanoti pfungwa dzekutanga chirongwa ichi dzakabva kuHurumende nedonzvo rekupedza nzara munyika.
“Tichishanda nemapazi akasiyana eHurumende anoita nezvekurima nevamwe, takavamba chirongwa kuno kuMashonaland West kuti murimi wese awane chikamu chemunda wake chaanorima mbesa dzetsanga diki dzinosanganisira nzungu, nyemba, bhinzi, maringazuva, zviyo, mhunga, mapfunde nezvimwe.
“Tinoona kuti varimi vazhinji vava kumhanyira kurima zvirimwa zvakaita sechibage vachisiya zvetsanga diki,” vanodaro Mambo Ngezi.
Nzungu
Vanoenderera mberi vachiti: “Muchirongwa ichi chekurima mbesa idzi, tinoona kuti chinobatsira kana zvirimwa zvakaita sechibage zvikatsva sezvo vazhinji vevarimi vedu tisina madiridziro. Mbesa idzi dzinoshingirira muzuva kureva kuti hatimbofa nenzara kana tikatevedza gwara rekurima mbesa dzetsanga diki.
“Mamwe matunhu edu haanaye mvura zvakanaka saka zvinotibatsira senyika.”
Mambo Ngezi vanoti pahurongwa huripo, mambo woga-woga nemasabhuku vanofanirwa kuva neminda yeZunde raMambo nezunde rasabhuku munorimwa zvirimwa izvi, koitawo mazunde ezvirimwa zvakaita sechibage.
Vanoti minda ichadyarwa zvirimwa izvi mizhinji yacho yakatorimwa kare zvekuti yangomirira kudyarwa.
Nyimo
“Mbeu ingava yenyemba kana nyimo chaidzo, maringazuva, bhinzi, mapfunde, mhunga, manhanga nezvimwe zvakasiyana varimi vanogona kudyara yemudura zvisinei kuti Hurumende ine hurongwa hwekuwanisa mbeu yose yezvirimwa zvetsanga diki izvi kuvarimi.
“Fungai kuti izvozvi tikataura nyaya yekuti kune chirimwa chinonzi tsenza, vana vedu havachazviziva saka tinoda kudzokera kuzvirimwa zvedu zvakare zvinobatsira nyika,” vanodaro Mambo Ngezi.
Mambo Ngezi
Vanoti nekusanduka kuri kuita mamiriro ekunze, zvinobatsira varimi kana vakarima mbesa idzi.
“Mbesa idzi dzinowanisa varimi mari nekukurumidza zvakare nekudya semhuri. Saka tinoti kuruzhinji rimai mbesa dzetsanga diki nzara ipere mumhuri,” vanodaro Mambo Ngezi.
