Kwayedza
Abel Ndooka
MUTAMBO wehushamwari wange uchifanirwa kutambwa nechikwata chenyika chemaWarriors necheBotswana nemusi weMugovera hauchisiko.
Sangano rinotungamira nhabvu munyika reZimbabwe Football Association (ZIFA) nhasi razivisa kuti mutambo uyu, uyo wange uchifanirwa kutambirwa kunhandare yeNational Sports Stadium, hauchaenderere mberi nezvikonzero zvaisina kutaura.
Pane runyerekupe rwekuti ZIFA yakamhanya kutaura kuti maWarriors achatamba neBotswana ivo vasina kubvumirana nesangano reBotswana Football Association.
Muchinyorwa chabva kuZIFA, inoti mutambo uyu hauchaenderere mberi asi vatambi vemaWarriors vange vashevedzwa kuti vauye kuzopinda mukembi vacharamba varimo.
“Zimbabwe Football Association inoda kuzivisa mhuri yese yenhabvu kuti mutambo wedu wehushamwari wange uchirongwa kuti titambe neBotswana wakanzurwa nekuda kwezvikonzera zvatisingakwanise kugadzirisa.
“Tinoda kukumbira ruregerero nechiitiko ichi nezvachakonzeresa kumhuri yese yenhabvu.
“Gadziriro hadzo dzicharamba dzichienderera mberi kusvika panopera ‘international break’ kuti zvipe varairidzi nguva yekutarisa vatambi vavo takatarisana nekuzotamba mitambo yekurwira kuenda kuWorld Cup apo maWarriors achatamba neRwanda neNigeria munaMbudzi,” inodaro ZIFA.
Vatambi vanotambira kunze kwenyika vakadai saRonald Pfumbidzai weSuperSport United, Divine Lunga (Golden Arrows yekuSouth Africa), Washington Arubi (SuperSport United) naMunashe Garananga weSheriff Tiraspol yeMoldova vari kutarisirwa kunge vari mukembi umo muchange muine vatambi 24 vaine murairidzi wemaWarriors, Baltemar Brito, kusvika pachapera “international break”.
Zvichakadaro, mitambo yeCastle Lager Premiership iyo yange yambomiswa kuitira kuti maWarriors atambe mutambo wehushamwari, yave kutambwa svondo rino.
Chamangwiza wePSL – Kennedy Ndebele – anoti mushure mekuita hurukuro neZIFA Normalisation Committee, vawirirana kuti mitambo yeMatch-day twenty seven igotambwa.
“Tinozivisa kuti mushure mekuita hurukuro neZIFA Normalisation Committee, mitambo yange yamiswa yeCastle Lager PSL Match-day twenty seven (27) ichatambwa nemusi wa14 na15 Gumiguru sekuzivisa kwatainge tamboita kare,” anodaro Ndebele.
Mitambo yePSL iriko svondo rino ichaona Dynamos ichenda kuGibbo Stadium uko ichanotamba neManica Diamond nemusi weMugovera, kuchiti Ngezi Platinum Stars iyo iri kutungamira palogo ichange iri pamusha payo kuBaobab apo ichatamba neChicken Inn nemusi weMugovera.
Highlanders ”Bosso” ichange iri pamusha zvekare nemusi weSvondo apo ichatamba neCranborne Bullets, kuchiti CAPS United ichatamba neSheasham nemusi weSvondo kuNational Sports Stadium.
