Kwayedza
Ashley Muchamiri
MURUME anogara kuAshdown Park, muHarare, akamhan’arirwa nemudzimai wake kumatare achinzi ari kumushungurudza achida kuti akanzurise mendenenzi.
Mevis Karimufumbi akamhan’arira Terrence Kambuwa kuHarare Civil Court achiti ari kumuonesa ndondo nenyaya iyi.
“Ishe wangu, ndinokumbirawo kudzivirirwa nemi, ndinoda kuti murume uyu abve pamba patinogara nekuti handisi kuda kuramba ndichirohwa nekutukwa pamberi pevana nevanyarikani,” anodaro.
Karimufumbi anoti Kambuwa akamuramba mudare remendenenzi achiti ava nemumwe mukadzi.
“Murume uyu akandiramba pamberi pedare taenda kunoti mendenenzi ikwidzwe achiti aisakwanisa kubhadhara uye aida kuti ndikanzurise mendenzi iyi achiti ane mumwe mukadzi anoda kuchengetwa asi kuri kunyepa,” anodaro.
Achipawo divi rake, Kambuwa anoti haana kumbobvira aramba Karimufumbi asi akamuudza kuti ava nemumwe mudzimai anogara kwaMurehwa uko anoenda kaviri pamwedzi.
“Mukadzi uyu handina kumbomuramba asi ndakangomuti ndava nemumwe mukadzi anogara kwaMurehwa uko kwandinongoenda kaviri bedzi pamwedzi,” anodaro.
Kambuwa anoti Karimufumbi anonyepa kuti anomutukira nyaya yemari yemendenenzi.
“Manyepo anotaurwa nemukadzi uyu, ndakatomukumbira kuti abvise mendenenzi kuti tikwanise kuwana mukana wekupihwa dzimba dzaida kupihwa kubasa kuiitira kuti mari ikwane,” anodaro.
Mutongi Noah Gwatidzo akapa Karimufumbi gwaro redziviriro.
