Kwayedza
Abel Ndooka
SACHIGARO weZIFA Normalisation Committee – Lincoln Mutasa – anoti komiti yake iri kushanda siku nesikati kutsvaga murairidzi mutsva wechikwata chenyika chemaWarriors.
Zvichitevera kudzoserwa kwakaitwa Zimbabwe mumhuri yenhabvu svondo radarika, chikwata chenyika chakabva chaiswa mudraw rekurwira kuenda kumutambo we2026 World Cup izvo zvichachiona chichitatsurana nezvimwe zvinoti South Africa (Bafana Bafana), Nigeria (Super Eagles), Benin, Rwanda neLesotho muGroup C.
Mitambo iyi inotarisirwa kutanga mwedzi inotevera.
Asi mubvunzo uri pamiromo yevatsigiri vazhinji venhabvu ndewekuti ndiani achagara pachigaro chinopisa chekutungamira maWarriors apo achatanga kurwira kuenda ku2026 World Cup iyo ichatambirwa kuUSA, Canada neMexico. Norman Mapeza ndiye akapedzisira kurairidza maWarriors – panguva iyo Zimbabwe yakange isati yatemerwa zvirango neFIFA, CAF neCOSAFA – apo akatungamira chikwata ichi kuenda kumutambo weAfrica Cup of Nations kuCameroon munaNdira gore radarika.
Mutasa anoti komiti yavo yakazvipa mazuva 100 ayo inofanirwa kugadzirisa nyaya dzakawanda, kusanganisira kugadzwa kwemurairidzi mutsva wemaWarriors.
“Nyaya yekugadza murairidzi wemaWarriors imwe yatiri kugadzirisa uye yatiri kufambira kutaura kuno, zviri muhurongwa hwedu pabasa ratiri kuita.
“Asi nyaya hombe iripo ndeyekuti tine basa guru ratakatarisana naro kusanganisira kuti titsvage mari yekufambisa basa redu nemazvo.
“Isu sekomiti yakapihwa basa iri tine zvirongwa zvatiri kuda kuti tinge tazadzikisa mumazuva 100 anotevera saka tiri kushanda zvakasimba kuti tazadzikise zvirongwa izvi. Asi hatisi kuzoudza vanhu zvatiri kuronga, vachazongoona basa richibatwa chete,” anodaro Mutasa.
Mutasa, uyo aimbove sachigaro weDynamos FC iyo akatambira kare, akagadzwa kuti atungamire komiti iyi uye achange achishanda nevamwe vanosanganira Skumbuzo Ndebele akambotambira Highlanders,
Rosemary Mugadza aimbotambira nekurairidza maMighty Warriors naNyasha Nyamandwe anove gweta.
Komiti iyi yakapihwa basa neSports and Recreation Commission (SRC) rekugadzirisa nhabvu yemuno iyo yange yaenda mudondo.
Pamusoro pezvo, komiti iyi ichaona zvekare pamusoro pebasa rekuzogadzwa kwebhodhi idzva reZIFA gore rinotevera.
